Me ardhjen e pranverës dhe të verës, në shtëpi ndodh që të gjendemi përpara situatave të papritura, siç është “pushtimi” nga milingonat. Të tërhequra nga era e ushqimit, ato shpesh zënë vende të caktuara në kuzhinë dhe shndërrohen në një makth të vërtetë.
Ka mënyra shumë efikase për eliminimin e këtyre mysafirëve të paftuar. Bëhet fjalë për metoda shumë natyrale, në mënyrë që të shmangni produktet kimike, të cilat dëmtojnë ambientin. Sigurisht që gjëja më e mirë është të evitoni sa më shumë të mundni hyrjen e milingonave në shtëpinë tuaj, duke mos lënë të shkujdesur copa buke, sheqeri apo produkte të tjera, të cilat i tërheqin këto insekte.
Nëse tashmë milingonat janë në shtëpinë tuaj, mund të përdorni erëza të ndryshme për t’i larguar, por edhe kanellë, piper të zi, piper të kuq apo karafil. Uji dhe sapuni jo vetëm që do të largojë këto insekte, por do të bllokojë në shumë raste edhe gjurmët e tyre, duke bërë që ato të mos kthehen më. Po ashtu edhe limoni ka të njëjtin efekt.
Në rastin kur milingonat janë me të vërtetë të shumta dhe doni t’i zhdukni menjëherë, mjafton përzierja e miellit me ujë: milingonat ushqehen me këtë lloj ushqimi, por duke marrë parasysh që uji me miell do të jetë i qullët, insektet do të ngordhin në të. /tesheshi.com/
