Nuk ka ndjenjë më të mirë sesa të kesh një shtëpi të pastër. Produktet ëpr pastrimin e ambientit në të cilin jetoni mund ti blini në supermarket, me çmime nga më të ndryshmet, por mund t’i gjeni edhe në kuzhinë. I tillë është edhe limoni, i cili ndihmon së shumti në pastrimin e orendive shtëpiake. Ja cilat janë disa përdorime alternative të limonit në shtëpi:
Furra dhe mikrovala – Limoni mund të përdoret për të pastruar furrën dhe mikrovalën në mënyrë të shpejtë dhe efikase. Mjafton të vendosni në vendet e bëra pis, pak lëng limoni. Yndyrna do të largohet nëse e fërkoni me një copë të butë.
Rendeja – Rendeja ju ngelet gjithmonë pis, veçanërisht nëse grini në të djathë? Zgjidhja e duhur është limoni. Do të mjaftojë të kaloni lëngun e limonit sipër rendes për ta pastruar nga çdo papastërti. Më pas shpërlajeni me ujë dhe rendeja do të duket si e re.
Dërrasa e prerjes – Është një nga objektet më të ndotura që kemi në shtëpi dhe që thuajse asnjëherë nuk e lajmë siç duhet. Një nga mënyrat natyrale për ta pastruar ka të bëjë me kombinimin e kripës me limon. Spërkatni sipërfaqen e drurit me kripë, shtoni më pas limon, fërkojeni fortë dhe më pas shpërlajeni me ujë.
Xhamat edhe pasqyrat – Jeni lodhur me produktet kimike në pastrimin e xhamave dhe pasqyrave? Krijoni vet një detergjent të përbërë nga uji dhe lëngu i limonit. Rezultati do të jetë fantastik.
Tualeti – Dihet që tualeti është një nga gjërat më të pista që ndodhet në banjë dhe limoni njihet për vetitë e tij dezinfektuese. Hidhni lëngun e limonit në pjesët më të pista të tualetit dhe më pas shtoni kripë./tesheshi.com/
