Fëmija që ndërroi jetë në duart e doktor Bardhylit te “Kur hapen dyert e jetës”, kishte pikërisht meningjit akut, siç vetë ai i tha kryetarit të nesërmen e atij zhvillimi në mesnatë, në orët e para të detyrës si doktor i sapodiplomuar, emëruar në një fshat mes malesh.
Dhe po nga kjo sëmundje e beftë ka humbur jetën dhe një adoleshente në Durrës, gjë që ka vënë alarmin mbi burimin e infektimit.
Autoritetet kanë nisur gjurmimin e kontakteve të vajzës së ndjerë. Ajo u dërgua me urgjencë në spital, por nuk mundi të jetonte dhe më vonë u zbulua se ishte prekur nga meningiti akut.
Gjithashtu, po merren masa dhe për personelin mjekësor të Urgjencës Spitalore të Durrësit dhe familjarët e vajzës, për të parë nëse ata janë prekur nga ky bakter, raporton TCH.
Masa po merren edhe në gjimnazin “Leonik Tomeo,” ku mësonte 17 vjeçarja, me ambientet e shkollës që do të dezinfektohen.
Gjimnazistja humbi jetën në shërbimin infektiv të QSUT, pasi gjendja e saj u përkeqësua me shpejtësi. Analizat laboratorike në ISHP pritet të përcaktojnë nëntipin e saktë të shtamit, gjë që do të ndihmojë në vlerësimin e rrezikut dhe ndalimin e përhapjes së kësaj sëmundjeje infektive.
Vajza u dërgua të shtunën në Urgjencën e Spitalit Rajonal të Durrësit me simptoma të ndryshme, si dhimbje koke dhe të vjella dhe menjëherë u vendos transferimi në Tiranë. Pavarësisht përpjekjeve të mjekëve, ajo nuk mundi të mbijetonte.
Mjekët kanë deklaruar se kjo formë e meningitit nuk ishte shfaqur prej kohësh në qytet dhe autoritetet janë vënë në lëvizje për të kuptuar burimin dhe për të parandaluar raste të tjera të mundshme.
Ç’është meningiti bakterial?
Meningiti bakterial është një inflamacion i rrezikshëm i membranave që mbulojnë trurin dhe palcën kurrizore. Shkaktohet nga baktere të ndryshme, si Neisseria meningitidis dhe Streptocoçus pneumoniae. Simptomat e tij përfshijnë temperaturë të lartë, dhimbje koke të forta, ngurtësi të qafës, të përziera dhe në disa raste konfuzione apo krizë epileptike.
Sëmundja mund të jetë fatale nëse nuk trajtohet shpejt dhe në mënyrë agresive me antibiotikë. Për më tepër, ajo mund të përhapet përmes pështymës ose sekrecioneve respiratore, duke rritur rrezikun e infektimit te personat që kanë pasur kontakt të ngushtë me të prekurin.
Edhe te filmi me doktor Bardhylin, ky i fundit tha se fëmija u soll me vonesë. /tesheshi.com/
