Selfiet janë ndaluar nga një festë fetare e pazakontë në Itali, në të cilën pendorët në kapuçë dhe rroba të bardha godasin veten e tyre derisa t’u rrjedhë gjak, shkruan britanikja Daily Mail.
Qindra vendas në fshatin mesjetar të Guardia Sanframondi në rajonin jugor të Campania, do të mblidhen këtë javë për të goditur veten në gjoks me tapë druri që përmbajnë gjemba metalike.
Është pjesë e një festivali fetar të njohur si Riti Settennali di Penitenza, që shënon zbulimin e një statuje të Madonnas dhe Fëmijës, qindra vjet më parë.
Kryetari i fshatit ka ndaluar selfiet nga festivali për herë të parë, në mënyrë që pjesëmarrësit të mund të përqëndrohen në aspektin shpirtëror të ritualit.
Mijëra turistë pritet të udhëtojnë në fshat për të parë të penduarit, të njohur si “battenti” ose “rrahësit”, duke goditur veten e tyre derisa t’u kullojë gjak, ngjashëm si në kremtimin e Qerbelasë me besimtarët shiit.
Për shkak se ngjarja e fundit u mbajt shtatë vjet më parë në vitin 2010, problemi i selfieve nuk ishte ngritur si çështje deri më tani.
“Nuk duhet të ketë selfie gjatë procesimit. Është më mirë që njerëzit të përqendrohen në aspektin fetar dhe të përjetojnë një ditë të mrekullueshme të spiritualitetit, një gjë e rrallë këto ditë”, tha kryebashkiaku i fshatit Floriano Panza.
“Shtatë vjet më parë nuk kishte shumë smartfonë”, tha ai për gazetën La Repubblica.
Festivali filloi më parë këtë javë dhe do të përfundojë të dielën, pas disa qindra marshimeve përgjatë rrugëve të fshatit pas statujës së Madonës, raportoi The Telegraph.
Gjatë gjithë javës, episodet e Testamentit të lashtë dhe të ri do të sillen në rrugët e qytetit italian, ndërkohë që java e festimeve do të kulmojë me marshin e së dielës.
Gjatë marshimit, ata do të godasin gjoksin e tyre me “spugna”, një copë e rrumbullakët e tapës që përmban gjemba.
Një numër më i vogël i “flagellanti” do të bashkohen me grupin në veshje të ngjashme, e të cilët do të rrahin veten me një rrip të metaltë.
Grupi do të veshë kapuçët për të mbetur anonim për shikuesit, të cilët do të derdhin verë të bardhë mbi pendestarët, për të dezinfektuar dhe pastruar plagët.
Stafi i urgjencës do të jenë në procesion në rast se kushdo që është i përfshirë ka nevojë për kujdes mjekësor.
Festivali ka një traditë qindra vjeçare, me dokumentin më të vjetër historik që shënon ritualet shtatëditore që datojnë në vitin 1620.
Rite të ngjashme me ato në Guardia janë të zakonshme në rajonet fqinje, ku zhvillohen edhe procesionet. /tesheshi.com/
