Nga Ylli Pata
E hëna është data 21 Dhjetor. Asnjëherë nuk ka pasur zyrtarisht një adresë zyrtare në kryeqytet me këtë datë të një ditë të muajit të fundit, por ka mbi 40 vjet që shqiptarët një zone të tërë i thonë “te 21 dhjetori”.
Bëhet fjalë për një nga territoret më të populluara dhe të rëndësishme të Tiranës ku kryqëzohet rruga “Muhamet Gjollesha” me atw të “Kavajës”; e qw dwr diku lidh dhe Shqipërinë e mesme me Jugun e vendit, por edhe me veriun, duke kaluar tek “Zogu i Zi”.
Po ç’përfaqëson “21 dhjetori”?! Bëhet fjalë për ndërmarrjen gjigande të ndërtimit të Tiranës që quhej “21 Dhjetori” dhe zyrat qëndrore i kishte në këtë lagje.
21 Dhjetori është dita e lindjes së Josif Visarianoviç Stalinit, diktatorit gjerogjian që qeverisi Bashkimin Sovjetik nga viti 1924 deri në 1953.
Mirë gjatë komunizmit, por edhe sot 25 vjet pasi i dhamë dërmën diktaturës, sërish kjo zonë quhet “njëzetënjëshi”.Pra, Stalinin e kemi në bark siç kemi Enverin e Mehmetin në dossierët pambarim të të përditshmeve shqiptare. Por nuk mbaron me kaq. Ka toponime të tjera që janë vënë por nuk përdoren asnjëherë.
Stadiumi “Selman Stërmasi” ndodhet në pjesën e Tiranës së re dhe përbën fushën e dytë kryesore të kryeqytetit. Por thuajse të gjitha brezat, edhe të rinjtë fare, e quajnë me emrin e vjetër “Stadiumi Dinamo”.
“Edit Durham” quhet një nga shkollat më të rëndësishme të kryeqytetit, që ka edhe numrin më të madh të nxënësve. Por të gjithë, madje edhe politikanë të së djathtës që kanë fëmijët aty e quajnë me emrin e vjetër “11 Janari”.
Ka edhe më toponime që nuk janë menduar mirë kur janë vënë, apo nuk është bërë një fushatë sensibilizuese por kjo ngre pikëpyetjen se vendosja e emrave duhet të jetë e menduar.
Këto kanë ngelur si emrat sllavë të shumë qyteteve e fshatrave shqiptarë që nuk u shqitën nga goja e njerëzve dhe dokumentet, edhe pse kanë kaluar më shumë se njëmijë e kusur vjet.
Disa rrugë të kryeqytetit mbajnë emra të rëndësishëm. por kur i sheh të vjen turp që mbajnë atë emër.
Një nga zgëqet më të ndyra të Tiranës në zemrën e saj, njësinë 5, mban emrin e kreut të Asademisë së Shkencave “Aleks Buda”, por ajo nuk është një rrugë, por një kthinë plot pluhur ku shiten veshje të përdorura.
Rruga “Teodor Keko” nuk është rrugë por e famshmja Unaza e Re ku ka trafik e smog të tmerrshëm. që më mirë të ishte quajtur ashtu siç i thërrasin njerëzit, pra “Unaza e Re”.
Emrat shpesh pushteti i ka vënë si qoka jo të sinqerta, se të ishte ndryshe ato do të kishin ngjitur. /tesheshi.com/
