Donald Trump do të jetë ish-presidenti i parë i Shteteve të Bashkuara që do të përballet me akuza penale, pas vendimit të një jurie të madhe të New York-ut për ta paditur atë.
Njoftimi historik të enjten mbrëma nga zyra e Prokurorit të Qarkut të Manhatanit pasoi javë të tëra spekulimesh për arrestimin e ish-presidentit, i cili synon të kandidojë për rizgjedhje në vitin 2024.
Ndërsa akuzat specifike janë ende sekrete dhe të vulosura, ato besohet se kanë të bëjnë me një pagesë prej 130,000 dollarësh të bërë nga ish-avokati i Trump për yllin e filmave për të rritur Stormy Daniels gjatë fushatës presidenciale të 2016-ës në SHBA.
Zhvillimi shkaktoi reagime të forta në të gjithë SHBA, duke përfshirë edhe mediat me ndikim.
Ja si reaguan ndaj këtij lajmi redaktorët e gazetave më të lexuara amerikane.
New York Times
New York Times, e cila përgjithësisht njihet për qëndrimin e saj editorial liberal, mirëpriti gjerësisht akuzat kundër Trump, duke shkruar se ka kaluar vite “duke injoruar normat dhe precedentët demokratikë dhe ligjorë” dhe “duke vepruar sikur rregullat nuk vlejnë për të”.
Në një editorial të titulluar “Edhe Donald Trump duhet të mbahet përgjegjës”, gazeta tha se prokurorët kishin të drejtë që hetuan Trump pavarësisht shqetësimeve për pasojat e mundshme për politikën thellësisht përçarëse të Amerikës dhe pasojat për Presidencën amerikane, dhe hodhi poshtë pretendimet e ish-presidentit se avokati i Distriktit të Manhatanit, Alvin Bragg, një demokrat, ishte i motivuar politikisht.
Në të njëjtën kohë, Times u bëri thirrje amerikanëve që të lënë mënjanë pikëpamjet e tyre politike kur shqyrtojnë rastin duke theksuar se Trump ka të drejtë për një “gjykim të drejtë dhe prezumim të pafajësisë“, pavarësisht “indiferencës së tij ndaj procesit të duhur për të tjerët”.
“Vendimi për të ndjekur penalisht ish-presidentin është një ndërmarrje e rëndësishme, veçanërisht duke pasur parasysh ndarjet e thella kombëtare që zoti Trump në mënyrë të pashmangshme do t’i përkeqësojë me afrimin e fushatës së 2024-ës”, thuhet në editorial.
“Por kostoja e dështimit për të kërkuar drejtësi kundër liderit që mund të ketë kryer këto krime do të ishte edhe më e madhe”.
Washington Post
Washington Post reagoi me kujdes ndaj aktakuzës ndaj Trump, duke shprehur dyshime për forcën e çështjes kundër ish-presidentit.
Në një editorial të titulluar “Aktakuza ndaj Trump, një provë e dobët për ndjekjen penale të ish-presidentit”, gazeta mendon se çështja që përfshin Stormy Daniels është “ndoshta më pak bindëse” nga krimet e mundshme për të cilat Trump po hetohet.
Gazeta tha se prokurorët duket se po ndërtonin një çështje “të re” dhe “të lëkundur” që mund të paralajmëroje akuza të tjera më serioze kundër Trump, i cili është gjithashtu nën hetim për rolin e tij në trazirat e 6 janarit në Capitol.
Një ndjekje penale e dështuar do t’i jepte gjithashtu ish-presidentit municion për akuzat e tij për gjueti shtrigash, tha gazeta.
“Perceptimi publik dhe strategjia politike nuk duhet të largojnë një prokuror qarku nga ndjekja e një çështjeje të fortë, por as nuk duhet ta bindin atë të ndjekë një çështje të lëkundur,” thuhet në editorial.
“Kjo ndjekje penale nuk duhet të ketë asnjë lëshim. Përndryshe, nuk ia vlen të vazhdohet.”
The Wall Street Journal
Wall Street Journal, e cila është e njohur për editorialet e saj konservatore, e përshkroi aktakuzën e Trump si “një ditë të trishtuar për vendin, me pasoja politike që janë të paparashikueshme dhe ka të ngjarë të jenë shkatërruese”.
Duke pranuar se mund të ketë prova bindëse kundër Trumpit që ende nuk janë parë, gazeta tha se analizat e ekspertëve ligjorë nuk frymëzojnë besim dhe se çdo ndjekje penale ndaj ish-presidentit do të duhet të përfshijë një krim të rëndë me prova “mjaft të forta që një votuesi i arsyeshëm do ta gjente atë bindëse.”
Gazeta në pronësi të Rupert Murdoch shkruan se aktakuza përbën një precedent të rrezikshëm për politikën amerikane.
“Z. Bragg po thyen një normë politike që ekziston për 230 vjet”, thuhet në editorial.
“Pasi një ish-president dhe kandidat aktual të akuzohet, një prokuror vendas republikan do të përpiqet të bëjë emër duke bërë të njëjtën gjë me një demokrat. Demokracia amerikane do të abuzohet dhe dëmtohet më tej. Zoti Bragg, një progresist provincial, po lëshon forca për të cilat të gjithë mund të pendohemi.”
Los Angeles Times
LA Times e quajti aktakuzën kundër Trump një “zhvillim të rëndësishëm dhe të kthjellët”, por u fokusua në nevojën për të siguruar që ish-presidenti të mos kthehet në detyrë në 2024, pavarësisht nga faji apo pafajësia e tij.
Gazeta tha se ndërsa Trump-it duhet t’i imponohet procesi i rregullt që i takon çdo të pandehuri, ai e ka skualifikuar veten nga detyra, pavarësisht nga rezultati ligjor.
“Për ata që sugjerojnë se aktakuza kundër ish-presidentit në një farë mënyre kërcënon zyrën presidenciale, ne besojmë se asgjë nuk do të kërcënonte presidencën dhe kombin aq sa zgjedhja e Trump-it në 2024”, thuhet në editorial.
“Ai është një narcisist i akuzuar dy herë, gënjeshtrat egoiste të të cilit për zgjedhjet e vjedhura frymëzuan një sulm terrorist në Kongresin amerikan. I dënuar apo i pafajshëm, Trump nuk duhet të kthehet në Shtëpinë e Bardhë”. /tesheshi.com/
