Zgjidhja e krizës politike është varur në shpresat e fundit, ndërkohë që afatet proceduriale ligjore po shkelen dhe vendi po shkon drejt zgjedhjeve të parakohshme. A është ky një skenar i mazhoracnës PS-LSI?
Kushtetuta e thotë qartë: nëse dështon zgjedhja e presidentit të ri në 5 raundet e parashikuara, parlamenti shpërndahet dhe vendi shkon në zgjedhje të parakohshme brenda 45 ditëve. Zgjedhja e presidentit të ri përkoi këtë vit me zgjedhjet e parashikuara elektorale të caktuara në datë 18 qershor, por nga ana tjetër përkoi dhe me një krizë politike, ku opozita ka vendosur të bojkotojë këto zgjedhje.
Votimi i parë për kreun e ri të shtetit ishte nul, pa kandidatë. Nëse edhe 4 raundet e tjera bëhen pa kandidat, pra dështon zgjedhja e presidentit të ri, atëherë vendi shkon në zgjedhje të parakohshme të cilat i bie të mbahen po në qershor, disa ditë para zgjedhjeve të përcaktuara tashmë me dekret të presidentit Nishani; një situatë kjo e papreçendentë.
Kompromisi politik si zgjidhje
E vetmja zgjidhje që do të nxirrte vendin nga ky ngërç ligjor është kompromisi politik, i cili edhe nëse ndodh do të ishte një shkelje e afateve ligjore. Shkelja e afateve ka nisur me një kërkesë të dy partive të mazhorancës qeverisëse, PS-LSI, të cilat i kanë kërkuara KQZ-së të shtyjë afatin e regjistrimit të koalicioneve. Nëse KQZ e shtyn këtë afat (edhe pse nuk ka asnjë precedent të mëparshëm që KQZ të ketë shkelur afatet e përcaktuara në ligj), atëherë PS dhe LSI marrin kohë që të gjejnë një zgjidhje për aleancën e tyre dhe për opozitën. Por nëse KQZ e refuzon, atëherë koalicioni i majtë nuk ekziston më dhe e vetmja rrugë që do ta shpëtonte këtë koalicion do të ishin zgjedhjet e parakohshme, të cilat do t’i kthenin edhe një herë procedurat nga fillimi.
Kreu i LIBRA-s, Ben Blushi këtë skenar demaskoi sot në Kuvend, por ai u hodh poshtë nga kryeparlamentari Meta.
“Doni të shkoni në zgjedhje të parakohshme? Mendoni se zgjedhjet e parakohshme mund ta zgjidhin këtë krizë? E keni gabim. Koalicioni ka skanduar 18 prill 2017 nuk ka më. PD duhet të kthehet dhe të marrë pjesë me çdo kusht në zgjedhje”- tha Blushi.
Por Meta u përgjigj se synimi është të gjendet gjuha e kompromisit me opozitën që ajo të futet në zgjedhje. “Për çështjen e presidentit qëllimi ka qenë jo për të dështuar raundet, por mosparaqitja e kandidatëve vjen për të treguar vullnetin për të bashkëpunuar me opozitën. Është në interes të të gjithëve që zgjedhjet të bëhen me opozitën”- tha Meta.
Çfarë thotë Kushtetuta për zgjedhjet e parakohshme:
“Në rast se edhe pas votimit të pestë asnjë kandidat nuk siguron shumicën e kërkuar, ose kur pas votimit të katërt pa sukses nuk paraqitet asnjë kandidaturë e re, Kuvendi shpërndahet.
Zgjedhjet e reja zhvillohen brenda 45 ditëve nga shpërndarja e tij.
Kuvendi pasardhës e zgjedh Presidentin e Republikës me shumicën e të gjithë anëtarëve të tij.” /tesheshi.com/
