Nga Mensur Krasniqi
Në Maqedoni, Platforma Shqiptare, ajo që u gatua në zyrën e kryeministrit Rama së bashku me faktorin shqiptar, vijon të shihet nga pala maqedonase si diçka që i ka vënë minat politikës së tyre. Reagimet janë nga më të ndryshmet dhe pothuajse të gjitha të përshkruara nga nervoziteti. Dhe nuk kanë faj. Është ndër të rrallat raste, para ose pas lufte, ku faktori shqiptar i imponohet atij maqedonas.
Ndër reagimet e fundit ishte ai i ish-ambasadorit Risto Nikovski. Ai shkoi deri aty sa tha se Platforma Shqiptare paraqet një goditje ndaj shtetit.
“Tash kur platforma e tyre është publike, kjo de fakto, ndoshta do të tingëllon ashpër, por mendoj se paraqet goditje ndaj shtetit. Do të thoni se janë fjalë të rënda, por këta janë shqiptarët e vërtetë që në formë më të mirë e sqarojnë situatën”, tha Nikovski gjatë një emision të Tv Nova.
Sipas tij, realizimi i kësaj platforme do të shënojë fundin e shtetit maqedonas. Madje ai kërcënoi dhe liderin e LSDM-së, Zoran Zaev, se në rast se formon qeveri nën kushte të zbatimit të kësaj platforme do të ballafaqohet me popullin maqedonas.
“Kyçe në gjithë këtë është se shqiptarët i çelën gjitha kartat, dhe për këtë duhet t’u jemi falënderues shqiptarëve. Tash më nuk bëhet fjalë për fshehtësi, të drejta njerëzore, parabarazi për shqiptarët dhe të tjera, por kjo platforme realisht është pjesë e projektit të madh për Shqipëri etnike dhe në një farë mënyre finalizim i saj. Realizimi i kësaj platforme, paraqet fundin e shtetit maqedonas, dhe nëse Zaev pranon kushtet e shqiptarëve do të ballafaqohet me popullin”, shtoi Nikovski.
Këto deklarata të ish-ambasadorit maqedonas, analisti politik Mersel Bilalli i quan të sponzoruara nga ana e pushtetit. Dhe sipas tij jo vetëm ambasadori Nikovski, por edhe një numër i konsiderueshëm i mediave proqeveritare sajojnë lajme të shpifura me kërcënime ndaj bashkësisë ndërkombëtare, që nëse pranohet realizimi i platformës së shqiptarëve, do të ndodh destabilizim i shtetit.
“Është e tepërt që të komentohen gjithë ata mentorë të sponzoruar nga pushteti i Gruevskit, sepse realisht ata s’kanë të bëjnë me asgjë reale pos mbrojtes së krimit të organizuar. Ata janë të angazhuar ekskluzivisht për afirmimin apo paralajmërimin e vendimeve apo qëndrimeve të kreut të VMRO-së, si do qofshin ata. Eshtë një panik evident në të gjitha mediumet që përkrahin krimin e organizuar që ka për qëllim frikësimin e bashkësisë ndërkombëtare me gjoja ndonjë destabilizim. Kurse në fakt shumica të tilla parlamentare kemi në shumë vende të botës. Parti të ndryshme kanë pasur më tepër deputetë, por nuk kanë pasur kapacitet koalicionues. VMRO me gjithë atë kampanjë shoviniste i varrosi kapacitetet koalicionuese me Shqiptarët. Por, poashtu duhet pasur parasysh se bashkësia ndërkombëtare është e vedosur që tani më strukturat e dyshuara për krim të organizuar të mbeten jashtë pushtetit dhe të ndeshen me drejtësinë. Mendoj se nuk duhet trajtuar serioze këso deklaratash sepse ata nuk kanë më kondicion destabilizues, pasi edhe në vet VMRO-në janë të bindur se kjo strukturë duhet ta lëshoj partinë”, tha Bilalli për tesheshi.com.
Kujtojmë se nga partia e Gruevskit lidhur me Platformën Shqiptare kanë thënë se është një përpjekje që të fillojnë përsëri bisedimet për Marrëveshjen Kornizë të Ohrit. Përveç kësaj, sipas VMRO-DPMNE-së, kushdoqoftë që e ka bindur BDI-në për të qenë pjesë e Platformës së përbashkët të shqiptarëve, nuk ka bërë asgjë tjetër, përveç se i ka sjellë dëm.
“Nëse përsëri bisedojmë për të njëjtën çështje atëherë të gjitha palët do të hapin kërkesa të reja në tavolinë dhe atëherë do të hapet Kutia e Pandorës. Vlerësojmë se procesi i tillë mund të na dërgojë në drejtim të gabuar pasi që edhe pakicat tjera në shtet mund të ofrojnë platforma pasi që këtë që BDI dhe partitë tjera shqiptare e krijuan vlen vetëm për shqiptarët. Në fund, mundet edhe shumica kombëtare, saktësisht maqedonasja, të formojë platformë të saj dhe ta jep si parakusht që në të ardhmen të jetë arsye për probleme të reja dhe rigrupime. Vlerësojmë se ai që e ka bindur BDI-në që të shkojë në atë rrugë i ka bërë dëm”, kanë thënë nga VMRO. /tesheshi.com/
