Nga Blendi Gashi
Një takim i kryeprokurorit të Shtetit, Aleksandër Lumezi, qoftë edhe i rastësishëm, i zhvilluar kohë më parë me deputetin e PDK-së, Elmi Reçica, ka bërë që në Kuvendin e Kosovës të drejtohen kritika në drejtim të njeriut kryesor që duhet të luftojë krimin dhe korrupsionin në vend.
Një foto e bërë në mënyrë të fshehtë ditë më parë nga aktivistë të VV-së të takimit në fjalë, ka bërë që të kapen mes tyre deputetët e partisë më të madhe në vend, PDK-së dhe partisë më të madhe opozitare VV-së.
Debatin e ka nisur deputetja e Lëvizjes Vetëvendosje, Albulena Haxhiu, e cila kërkoi që të kapen “peshqit e mëdhenj”.
Por ajo shprehu brengën e saj duke thënë se një gjë e tillë assesi nuk mund të ndodh kjo, derisa kryeprokurori i shtetit, Aleksandër Lumezi, sipa saj qëndron në kafene me politikanë të partive në pushtet.
“Në vend që prokurori të punojë në detyrën e tij, ai shihet në kafene. Para se prokuroria të ngrisë ekspres aktakuza ndaj deputetëve të opozitës duhet më së miri të gjykohet Kryeministri Isa Mustafa”, ka thënë Haxhiu.
Reçica i PDK-së ia tërheq vërejtjen VV-së: Kujdes me veprimet tuaja…
Ndaj deklaratës së bërë nga deputetja Haxhiu reagoi ashpër deputeti i PDK-së, Elmi Reçica, i cili është pikërisht politikani që shihet në foto me kryeprokurorin Lumezi.
Reçica i sugjeroi VV-në të ketë kujdes për veprimet që bën, duke shtruar pyetjen se a mos kjo lëvizje po e tenton logjikën e UDB-së se kush me kënd po rrinë?!
“Besoj se është dhënë shumë mund, gjak, burgje që të mos instalohet kjo logjikë. Me çfarë autorizimi bën VV fotografi të fshehta. Mos keni ndonjë shërbim të fshehtë. Mund të angazhoheni këtu, të debatoni dhe t’i shpalosni mendimet e juaja, por jo të bëjnë veprime të tilla”, iu kundërpërgjigj Reçica deputetes Haxhiu.
Prokuroria: Deklaratat e tilla s’mund ta zbehin vendosmërinë e Lumezi
Tesheshi.com kontaktoi edhe me Prokurorinë e Shtetit pas akuzave të bëra nga deputetja Haxhiu.
Liridona Kozmaqi, zëdhënëse e atyshme, tha se institucioni i tyre nuk merret me perceptime ose paragjykime, porse është i pavarur, kompetent dhe përgjegjës për ndjekjen e personave të dyshuar për kryerjen e veprave penale.
“Deklaratat e tilla, nga kushdo qoftë që vijnë, nuk do të mund ta zbehin vendosmërinë dhe përkushtimin e kryeprokurorit Lumezi për të kontribuar në forcimin e sundimit të ligjit, duke dhënë rezultate në rritjen e efikasitetit në gjithë sistemin prokurorial, në luftën më efikase kundër krimit të organizuar, korrupsionit, si dhe në zbulimin dhe hetimin e të gjitha veprave penale”, ka thënë Kozmaqi, për tesheshi.com.
Ajo më tej ka thënë se Prokuroria e Shtetit ushtron funksionet e veta në mënyrë të paanshme, duke siguruar trajtim të barabartë, objektiv dhe pa paragjykime për të gjithë personat, pavarësisht gjinisë, racës, prejardhjes kombëtare apo sociale, apo lidhjeve politike, besimeve fetare, apo pozitës shoqërore.
“Andaj sa herë ofrohen prova të mjaftueshme se është kryer një vepër penale, pa marrë parasysh se nga kush, prokuroria vepron dhe do të veproj në përputhje me kompetencat që ka”, ka thënë Kozmaqi. /tesheshi.com/
