Mungesa e kryeministrit dhe ministrave në shumicën e seancave parlamentare të Kuvendit të Kosovës është bërë një dukuri e zakonshme, për çka po ngjallë jo pak reagime nga opozitarët.
Një pjesë e tyre e injorojnë tërësisht institucionin ligjvënës, duke mos qenë të pranishëm jo vetëm gjatë debateve të rëndësishme, por as në kohën e pyetjeve parlamentare, kur deputetët ngrenë shqetësimet e tyre për problemet e shoqërisë.
Në pamundësi për të adresuar çështje të rëndësishme, deputetët opozitarë shpeshherë kanë adresuar kritika të mëdha në drejtim të ekzekutivit duke kërkuar që të vendoset një mekanizëm, që i detyron ministrat të jenë të pranishëm në seanca.
Edhe në seancën e sotme deputetët shtruan një mori pyetjesh por, që shumica prej tyre nuk morën përgjigje meqë munguan ministrat dhe kryeministri.
Prezent në sallë ishin vetëm ministri i Jashtëm, Enver Hoxhaj; ministrja e Drejtësisë, Dhurata Hoxha dhe ministrja e Tregtisë dhe Industrisë, Hykmete Bajrami. Kjo e fundit iu përgjigj pyetjeve të Visar Ymerit (VV) dhe Lirie Kajtazit (LDK).
Disa prej deputetëve anuluan pyetjet e disa të tjerë edhe i parashtruan.
Deputeti i partisë NISMA për Kosovën, Enver Hoti pyeti kryeministrin se sa zëvendësministra ka qeveria por sigurisht mbeti pa përgjigje.
Ndërsa deputetja e AAK-së, Teuta Haxhiu pyeti kryeministrin rreth dialogut me Serbinë dhe nëse kanë shtruar si temë çështjen e të pagjeturve, por që mbeti pa përgjigje.
Donika Kadaj-Bujupi, deputete e VV-së, kishte një pyetje për kryeminsitrin por ajo vendosi të mos e lexoj atë duke kritikuar atë për mungesën.
Ja si e arsyeton Abrashi mungesën e ekzekutivit në Kuvend
Mungesën e kabinetit qeveritar në seancat e Kuvendit, kohë më parë është munduar ta arsyetoi zëdhënësi i qeverisë, njëherit ministri i Punës Arban Abrashi duke thënë se një gjë e tillë po ndodh për shkak të mungesës së koordinimit.
“Besoj se ajo që mungon këtu është një koordinim më i mirë, shpesh herë edhe ministrat ballafaqohen me moskoordinim. Kjo ka të bëjë me deklarimet, për shembull shumë herë koha e deklaratave zgjatet përtej kohës së deklaruar për pyetje, ndaj duke qenë se ata kanë edhe detyrime të tjera, dalin t’i kryejnë ato. Jemi në një proces, gjatë të cilit duhet të punohet. Normalisht edhe kryeministri na ka thënë të jemi prezent në Kuvend, t’u përgjigjemi pyetjeve, por ndonjëherë edhe seancat, ku kam parasysh kohën e pyetjeve, zgjasin shumë më shumë se parashikimet. Sidoqoftë, nuk është praktikë apo e qëllimshme që të mungojnë”, ka thënë Abrashi.
Sipas rregullores së Kuvendit, deputetët kanë të drejtë vetëm dy herë t’i shtrojnë pyetjet parlamentare, çka i detyron ata t’i ruajnë pyetjet, me qëllim që kur t’i bëjnë të marrin përgjigjen e duhur. Edhe në këtë rast, për shkak se aktualiteti i temës rrezikon të humbet, deputetët zgjedhin t’i parashtrojnë pyetjet, pavarësisht nëse do të marrin përgjigje apo jo. /tesheshi.com/
