Qeveria indiane e ka ndaluar organizatën humanitare të themeluar nga Nënë Tereza gjatë jetës së saj që të marrë fonde të huaja, duke deklaruar se organizata katolike nuk i plotëson kërkesat e përcaktuara nga ligjet vendase.
Ministria e Punëve të Brendshme njoftoi se kërkesa për rinovimin e licencës, e cila i mundëson asaj organizate të marrë mjete nga jashtë, është refuzuar.
Ministria ka deklaruar në sqarimin se ka pasur disa “disvantazhe”, por nuk ka dhënë detaje, raporton AP.
Vendimi, i cili do t’i japë një goditje një bamirësie të njohur që kujdeset për të varfërit, vjen pas një sërë sulmesh nga grupet e djathta hindu ndaj të krishterëve në Indi. Vetë qeverisja indiane, ka element të fortë të nacionalizmit hindu, të cilin po e vuajnë edhe muslimanët.
Motrat e Bamirësisë Misionare, e themeluar nga Nënë Tereza, kohët e fundit është vënë nën kritika dhe është nën hetim për gjoja se ka detyruar disa njerëz në strehën e saj të lexojnë pjesë të Biblës dhe të recitojnë lutje të krishtera.
Por organizata në fjalë i ka mohuar akuzat.
Nënë Tereza (1910-1997) është fituese e Çmimit Nobel për Paqen. Ndërkohë, kreu i Kishës Katolike Romake, Papa Françesku, e shpalli atë shenjtore dy dekada pas vdekjes së saj.
Ajo quhej Anjeze Gonxhe Bojaxhiu.
Nënë Tereza ishte një shqiptare e lindur në Shkup, e cila iu bashkua organizatës së Nënës së Hyjit të Loretos në Irlandë në vitin 1928 dhe më pas themeloi organizatën e Motrave të Dashurisë Misionare në Kalkutë në vitin 1950. /tesheshi.com/
