Me fenomenin e urbanizimit po përballen disa qytete të Italisë, të cilat për të gjetur banorë të rinj përdorin si “karrem” programet e banesave, shitja e të cilave nis nga një euro.
Siç raporton CNN, qyteti Sambuca në Siçili ka përjetuar një kërkesë të madhe për shtëpi të lira për shitje në 2019 dhe 2021, dhe tani po përgatitet të dalë në ankand për një grup të tretë shtëpish, këtë herë me çmime fillestare prej 3 €, me shpresën se në të ardhmen do të ketë edhe më shumë shitje.
Qyteti i Sambuca u bë kryetitull botëror në vitin 2019 kur u raportua për herë të parë se 16 shtëpi po shiteshin për një euro. Dy vjet më vonë, qyteti ofroi një grup të dytë shtëpish, këtë herë me një çmim fillestar prej dy euro.
Në fakt, siç raportohet nga CNN, këto shitje tërhoqën blerës ndërkombëtarë deri në Lindjen e Mesme dhe ndihmuan në rigjallërimin e ekonomisë vendase me një fluks prej 20 milionë eurosh, përmes qirave dhe dyqaneve të reja, si dhe kontratave me arkitektë, topografë, dekoratorë dhe noterë. Deri më tani janë shitur 250 shtëpi, tha kryebashkiaku për median, duke theksuar se interesi në rritje për pushimet në Itali ka krijuar kushtet që kjo përpjekje të ketë sukses.
Nga braktisja e shtëpive deri te ringjallja e qytetit
Përpjekjet e suksesshme të Sambuca-s për të shitur shtëpitë e saj të zbrazëta i atribuohen kryesisht faktit që autoritetet lokale në fakt zotërojnë shtëpitë e braktisura.
Qytete të tjera italiane të braktisura, si fshati mesjetar Patrica, në jug të Romës, janë përpjekur të nisin skema të ngjashme, por kanë luftuar për të gjetur ish-pronarët për të marrë leje për të shitur shtëpitë e tyre bosh.
Autoritetet e Sambuca-s morën në zotërim shtëpitë e braktisura të qytetit pas tërmetit që goditi luginën përreth Belices në vitin 1969. Fatkeqësia natyrore bëri që vendasit të largoheshin nga vendi, duke lënë pas shtëpi bosh. Pikërisht në atë kohë qeveria e Romës miratoi një ligj të posaçëm për ringjalljen e Sambuca-s që i jepte bashkisë pronësinë e shtëpive të braktisura, pa ndërmjetës. Kjo do të thotë se procesi i shitjes është shumë më i shpejtë, pasi autoritetet vendore nuk kanë nevojë të lidhin pronarët me blerësit.
Rezidencat e ofruara janë shtëpi për një familje, me dy ose tre dhoma gjumi, 50 deri në 80 metra katrorë, të ndërtuara me gurë kafe të artë dhe të shtrira në një ose tre kate. Shumë prej shtëpive kanë ballkone prej hekuri të farkëtuar, me pamje nga rrugët me kalldrëm dhe verandat panoramike, si dhe dyer origjinale të vjetra prej druri të lyera me jeshile dhe harqe dhe dritare të dekoruara.
Por shumica e shtëpive kanë nevojë për riparime dhe janë të mbushura me sende të harruara dhe grumbuj mobiljesh të thyera dhe të pluhurosura. Në varësi të gjendjes së pronës, rinovimet zakonisht fillojnë me 30,000 €, por mund të arrijnë mbi 200,000 €, varësisht nga sa duan të investojnë pronarët.
Megjithatë, në treg ekziston një kusht pasi rregullat e skemës parashikojnë që blerësit duhet të kenë përfunduar punimet e rinovimit të shtëpive brenda tre viteve ose rrezikojnë të humbasin garancinë e paradhënies. Në herët e mëparshme, shtëpitë përfundimisht shiteshin për çmime ndërmjet 1 dhe 25,000 €, ndërsa shumica përfunduan duke u blerë nga 5,000 deri në 10,000 €.
Të interesuarit mund të gjejnë foto dhe përshkrime të shtëpive në dispozicion, si dhe formularë aplikimi në faqen zyrtare të bashkisë. /tesheshi.com/
