Në fillim u tha që LSI-ja nuk do të jetë fare e pranishme vizualisht, apo edhe formalisht, në zgjedhjet e 11 shtatorit. Më pas, siç e shpjegoi Ilir Meta, baza e Dibrës ra dakord për një koalicion me PS-në.
Por dje, në prezantimin zyrtar të kandidatit të mazhorancës për kryetar bashkie, ku ndodhej kryeministri Edi Rama, mungoi aleati i tij, Ilir Meta.
Zyrtarisht “me arsye”, pasi ndodhej në mbledhjen e Konferencës së Kryetarëve, dhe kishte dërguar në Peshkopi sekretarin e përgjithshëm, Luan Ramën, dhe deputetin e “përjashtuar” Përparim Spahiu.
Të dy veprimtaritë kanë qenë të planifikuara, pra, të vendosura që ditë më përpara, dhe nuk ka dyshim se mund të rregullohej që Meta ta mblidhte Konferencën e Kryetarëve paradite dhe të merrte pjesë pasdite në tubimin e mazhorancës.
Por vetë kryetari i Kuvendit ka deklaruar se është më i përkushtuar në rregullimin e marrëdhënieve me opozitën në këto kohë, për të bërë të mundur afrimin e konsensusit për reformën në drejtësi. Dhe një dalje në mitingun e Dibrës do t’i rriste temperaturat politike, duke i dhënë një mesazh dueli opozitës.
Por çështja është se kryetari i Kuvendit pa dyshim që mban një post mbi palët, dhe i tillë është në të gjithë botën. Politikani që ulet në karrigen e drejtuesit të Parlamentit e pushon veprimtarinë “partizane” politike, përveçse në opinionet e tij.
Gjithsesi, dalja e Edi Ramës në Dibër me Ramën e LSI-së është ulje “steke” e përfaqësimit politik, dhe sjell medoemos një mesazh të ndryshëm në sytë e opinionit publik. Pasi në zgjedhjet lokale të vitit 2015, në 61 bashkitë e Shqipërisë, Edi Rama dhe Ilir Meta i kanë paraqitur së bashku kandidatët për kryetarë. Siç duket, Dibra bën përjashtim. Nuk është rastësi që edhe ish-kryetari i shkarkuar e akuzoi LSI-në për komplot.
Portali i drejtuar nga Artur Zheji, i njohur për politikën editoriale pro Metës, në përshkrimin e mitingut të Peshkopisë e cilëson si “të dyfishtë” mesazhin e deputetit të LSI-së Përparim Spahiu në Dibër.
“Shfaqet në Dibër, në tubimin zgjedhor të Peshkopisë, deputeti i përjashtuar i LSI-së, deputeti i Dibrës, Përparim Spahiu. Ai nuk foli për mosbërjen e Rrugës së Arbërit, si ca pak muaj më parë, por shprehu mbështetje për Muharrem Ramën, që e mbiquan pak si shpesh ‘Doktori’, duke sjellë ndonjëherë ngatërresa të pafajshme asociacionesh. Por Spahiu ishte serioz dhe reflektiv. Është kjo fushatë edhe një ‘test’ për rikthimin e tij në mënyrë të plotë në Grupin Parlamentar të LSI?,” shkruan portali 360 gradë për mitingun e Peshkopisë.
Aktualisht kemi të bëjmë në mos me unitet, me një “armëpushim” imazhi. Më 12 shtator do të shikohet qartë dhe do të përkthehet më mirë mungesa e Ilir Metës në tubimin e djeshëm të Dibrës. /tesheshi.com/
