Nga Blendi Gashi
Rekomandimi pozitiv për liberalizimin e vizave për Kosovën i dhënë nga Komisioni Evropian ka gëzuar tej mase shqiptarët e Kosovës dhe jo vetëm.
Por, ky lajm riktheu buzëqeshjen sidomos tek politikanët kosovarë, në veçanti tek përfaqësuesit e dy partive në pushtet PDK dhe LDK, të cilët “luftonin” se kush po e jep lajmin i pari.
Pothuajse të gjithë zyrtarët e dy partive në koalicion qeverisës mbushën profilet e tyre të rrjeteve sociale me lajmin e gëzueshëm “Bac u kry, na i hoqën vizat”.
Ndërsa, njëri ministër i LDK-së, konkretisht ai i Punëve të Brendshme mbante konferencë në Bruksel, në Prishtinë një gjë të tillë e bënte ministri i Integrimeve Evropiane Bekim Çollaku, të cilët rekomandimin për liberalizimin e quajtën historik për Kosovën, duke mos harruar të thonë se kjo u arrit falë punës së ekzekutivit.
Përveç dy ministrave në fjalë, konferencë për vizat mbajti edhe kryekuvendari Kadri Veseli, njëherësh kandidati për të marrë kreun e PDK-së, por jo vetëm, pasi ambiciet e tij janë që të marrë edhe pozitën e Kryeministrit, të cilën tani e mban Isa Mustafa.
Konferencën e kryeparlamentarit Veseli kushdo që e ka dëgjuar mirë, fare lehtë mund ta ketë vërejtur se të gjitha meritat për rekomandimin pozitiv për vizat ia atribuoi partisë, drejtimin e së cilës pritet zyrtarisht ta marrë nga 7 maji.
Me paraqitjen e tij dhe mveshjen e të gjitha meritave partisë së tij, Veseli sikur deshi të tregonte “dhëmbët” ndaj partnerit qeverisës LDK-së, konkretisht liderit të saj, kryeministrit aktual Isa Mustafa.
Një gjë të tillë më së miri e tregon mesazhi i urimit që bëri në konferencë kryeparlamentari Veseli pas marrjes së lajmit të gëzueshëm, pra rekomandimit pozitiv për heqjen e vizave.
“I falënderoj qytetarët për durimin dhe përkushtimin e tyre. Pa dyshim që PDK-ja ishte lokomotiva e këtij procesi. E falënderoj ish- kryeministrin, ministrat e integrimit, ministrat e brendshëm dhe të jashtëm”, deklaroi dje kryekuvendari Veseli në konferencë.
Pra, siç mund të shihet nga mesazhi i urimit, kreu i Kuvendit të vetmin zyrtarë të lartë shtetërorë që nuk e falënderoj është kryeministri aktual i vendit, Isa Mustafa.
Por, pyetja shtrohet se a është ky një lëshim i bërë pa qëllim nga ana e Veselit, apo…?
Ndoshta mund të jetë një gjë e tillë, që Veseli nga emocionet të ketë harruar ta falënderojë edhe kryeministrin Mustafa, apo ndoshta kryekuvendari aspak nuk e sheh kontributdhënës rolin e kreut të ekzekutivit në procesin e vizave.
Padyshim se mos dhënia e meritave edhe për kryeministrin është sinjali i radhës se PDK dalëngadalë dhe në heshtje po përgatitet për zgjedhje të reja, e Kadri Veseli që të rrëzojë nga pozita e kryeministrit Isa Mustafën, që më pas ai të ulet në kolltukun e kreut të ekzekutivit. /tesheshi.com/
