Elon Musk mbylli blerjen e tij prej 44 miliardë dollarësh të Twitter, dhe hapi i tij i parë ishte shkarkimi i menaxhmentit të lartë të atij rrjeti social.
Sipas njerëzve të njohur me situatën, Musk shkarkoi CEO-n Parag Agrawal, Zyrtarin Kryesor Financiar Ned Segal dhe kreun e çështjeve ligjore dhe politikave Vijay Gadde.
Agrawal dhe Segal ishin në selinë e Twitter në San Francisko kur u bë marrëveshja dhe u shoqëruan jashtë, shtuan burimet. Twitter, Musk dhe drejtuesit e shkarkuar nuk iu përgjigjën menjëherë kërkesës së Reuters për koment.
Musk akuzoi liderët e mëparshëm se e mashtruan atë dhe investitorët për numrin e llogarive false në platformë, si dhe nuk i dhanë atij argumente të qarta se si të arrijë ambiciet e larta që ka me platformën sociale me ndikim.
Musk tha se dëshiron të mposhtë “botët e padëshiruar” në Twitter, të bëjë të disponueshme publikisht algoritmet që përcaktojnë se si do t’u prezantohet përmbajtja përdoruesve dhe të parandalojë që platforma të bëhet një dhomë për urrejtje dhe ndarje.
Musk nuk ka ofruar detaje se si do t’i arrijë të gjitha këto dhe kush do ta udhëheqë kompaninë. Ai gjithashtu njoftoi pushime nga puna, duke lënë rreth 7,500 punonjës të Twitter të shqetësuar për të ardhmen e tyre, shkruan Reuters.
Ai dëshiron që Twitter të jetë një platformë reklamimi
Më herët të enjten, Elon Musk tha se dëshironte që Twitter të bëhej “platforma më e respektuar e reklamave”, e cila u interpretua si një përpjekje për të fituar besimin e reklamuesve përpara blerjes së pritshme të rrjetit social, ndërsa tha gjithashtu se me këtë blerje që ai donte të “ndihmonte njerëzimin”.
Musk, bashkëthemeluesi i Twitter Jack Dorsey dhe investitorë të tjerë kanë sugjeruar më parë se duan të largojnë rrjetin social nga reklamat dhe të gjenerojnë të ardhura përmes abonimeve dhe mjeteve të tjera. Vetë Musk dikur shkroi se “e urren reklamat”.
“Ka shumë spekulime se pse bleva Twitter dhe çfarë mendoj për reklamat. Shumica prej tyre e kanë gabim. Në thelb, Twitter dëshiron të jetë platforma më e respektuar e reklamave në botë që fuqizon markën tuaj dhe sjell rritje për kompanitë”, shkroi Musk, njeriu më i pasur në botë dhe CEO i Tesla-s.
Kutojet se më shumë se 90 për qind e të ardhurave të Twitter në tremujorin e dytë të këtij viti erdhën nga reklamat.
Ai tha gjithashtu se “natyrisht që nuk mund të shkruash gjithçka pa pasoja” në Twitter, por se dëshiron që platforma të jetë “mikpritëse për të gjithë”.
Musk, një i vetëshpallur “absolutist i fjalës së lirë“, tha në maj se do të hiqte një ndalim në Twitter ndaj ish-presidentit amerikan Donald Trump, i cili u hoq nga rrjeti në fillim të vitit të kaluar për shkak të frikës së nxitjes së dhunës pasi mbështetësit e tij sulmuan Kongresin amerikan.
Një sagë plot kthesa
Sipas Reuters, blerja e Twitter nga Musk përfaqëson kulmin e një sage plot kthesa, ku dyshohej nëse multimiliarderi do të ishte në gjendje të mbyllte marrëveshjen.
Në pranverë, Musk ofroi të merrte platformën për 54.20 dollarë për aksion, duke e vlerësuar atë në 44 miliardë dollarë. Bordi drejtues i rrjetit social në fillim me shumë ngurrim e pranoi ofertën.
Sipërmarrësi kapriçioz refuzoi në mënyrë të njëanshme këtë marrëveshje në korrik dhe Twitter nisi veprime ligjore për ta detyruar atë të respektojë angazhimin e tij.
Më në fund, në fillim të tetorit, një gjykatë në shtetin amerikan të Delaware urdhëroi përfundimin e padive të Twitter kundër Elon Musk dhe i dha atij kohë për të financuar marrjen e tij. /tesheshi.com/
