Kanë kaluar pak ditë nga kapja e gjysmë toni kokainë që hyri në Shqipëri nga Kolumbia dhe ende operacioni i policisë nuk ka përfunduar.
Janë arrestuar dy persona, shoferi i kamionit ku ishte droga dhe menaxheri i kompanisë ku u magazinua narkotiku i klasit të parë.
Pronari i kompanisë së bananeve ku ishte futur kokaina, nuk ka mbërritur ende në Shqipëri, ndërkohë që në një intervistë televizive ka deklaruar se nuk dinte gjë se kush e kishte futur drogën në ngarkesën e tij.
Por ndërkohë, shoferi dhe menaxheri edhe pse janë deklaruar të varfër kanë pajtuar një nga avokatët më të shtrenjtë në Shqipëri.
Në diskutimet mediatike mbi aktivitetin e kompanisë ku u gjet droga, është bërë e ditur se firma kishte një histori subvencioni nga fondet shtetërore, pra ka marrë mbshtetje të madhe financiare.
Ish-ministri i Bujqësisë, Edmond Panariti ka reaguar menjëherë duke deklaruar se nuk ka qenë dikasteri i tij që i ka dhënë subvencion kompanisë së bananeve, por njw delegacioni i Bashkimit Europian në Tiranë.
Vetëm me këto fakte të dala deri tani, krijohet një lloj panorame e funksionimit të skemës e cila ngjan pikë për pikë me precedentin sllovak që ka tronditur Europën prej ditësh, ku u vra gazetari Ján Kuciak i cili përgatiti një investigim të gjatë që i mori jetën.
Skema është e ngjashme: me paratë e kokainës financohen biznese kryesisht bujqësore, por që brenda kanë edhe ndërtime, energji, media, mjedis etj.
Bizneset nuk janë të suksesshme; madje marrin edhe subvencione nga fondet shtetërore dhe ato të huaja për të zgjeruar aktivitetin.
E gjithë kjo skemë bën që në fund paratë e kokainës të pastrohen dhe të dalin në treg si asete të “freskëta bio”.
Mirëpo asgjë nuk është rastësi. Tashmë e gjithë kjo skemë në Shqipëri ka mbi 3 vite që jo vetëm studiohet me hollësi, por është dokumentuar gjithçka.
Prej një viti në të gjithë portet e Shqipërisë janë instaluar celula të DEA-s amerikane që informmacionin e marrë nga kolegët e tyre në Amerikën Latine e përpunuan në terren.
Këto informacione janë kryqëzuar me Guardia di Finanza-n italiane, policitë e shteteve të BE-së, duke krijuar një tabllo tashmë të qartë.
Kulmi ishte superoperacioni i vitit 2016 kur u kapën mbi 30 bosa shqiptarë të drogës në Europë, që jo vetëm kanë folur por janë bërë bashkëpunëtorë të drejtësisë. Ndaj tashmë duhet se ka ardhur kohë e ekzekutimit.
Kapja me “presh në duar” të kokainës gjysmë toni ishte vetëm nisja e një aksioni të madh kapjes që nuk do të zhvillohet vetëm në Shqipëri, por në të gjithë Europën.
Edi Rama deklaroi në tetor në Kuvend se “FBI dhe DEA do të vijnë këtu të drejtojnë operacione të mëdha për të kapur të gjithë krerët e bandave në vend”.
Madje edhe Lulzim Basha, natyrisht duke përdorur ashtu si kryeministri politikisht informacionin që kishte marrë nga ambasadori amerikan Donald Lu, deklaroi se “shumë shpejt do të kapen krerët e krimit”.
Mirëpo këto ditë po ndodh një tollovi propogande politike ku njëra palë e quan kokainën dhe pronarët e saj si të lidhur me PS-në dhe tjetra me PD-në.
Përse nuk presin hetimet që tashmë po i zhvillon një Prokuror që nuk cilësohet “i kapur” nga opozita?
Nga e hëna, të reja të mëdha do të dalin. Dhe të gjitha do të vijnë nga Gjermania ku mësohet se është zbuluar edhe një prek kokave të “40 bandave” që deklaronte disa muaj më parë Donald Lu.
Nga java e ardhshme pritet që “peshqit” të dalin në breg… /tesheshi.com/
