Po aplikohet e njëjta skemë si shtatë vite më parë mes partisë së Edi Ramës dhe asaj të Ilir Metës.
Fshikullimet virtuale në rrjetet sociale ndërmjet Elisa Spiropalit dhe Klevi Pojanit për aleancën PS-LSI kanë qenë dukshëm bataretë e para të një “gjëmimi” politik që pritet të ndodhë së shpejti në mbledhjen e parë të Këshillit Bashkiak të Tiranës.
Administrata e Erjon Veliajt ka prej kohësh jo vetëm pakënaqësinë, por edhe kundërshtimin e fortë të aleatit kryesor të tij, partisë së Ilir Metës.
Nënkryetari i LSI-së, Petrit Vasili, e sulmoi ashpër kryetarin Veliaj një muaj më parë, duke e akuzuar si të njëanshëm dhe partiak.
Nënkryetarja e bashkisë, përfaqësuese e LSI-së, Brunilda Paskali, ka kohë që nuk komunikon me shefin e saj, si pjesë e mospranimit nga Veliaj të propozimeve të LSI-së për punësime dhe investime.
Por, siç mësohet, palët janë përplasur edhe për çështjen e kullave te diga e liqenit artificial, ku LSI-ja ka patur një qëndrim të afërt me Partinë Demokratike. Madje ndërtuesi i kompleksit u është shprehur pronarëve të truallit se priste sinjale të rëndësishme nga LSI-ja.
Një nga anëtaret e këshillit bashkiak të Tiranës, Elisa Spiropali, e cila shkroi një status shumë ironik ndaj LSI-së, është përplasur me nënkryetarin e LRI-së, Klevi Pojani, të cilin e ka hedhur edhe në gjyq.
Po ç’ndodhi në vitin 2009?
Ilir Meta, në shkurt të atij viti, e prishi përfundimisht koalicionin me PS-në dhe tentoi ta rrëzojë buxhetin e bashkisë së Tiranës, që drejtohej asokohe nga Edi Rama.
Vetë Monika Kryemadhi e drejtoi seancën në këshillin bashkiak të Tiranës, por buxheti u miratua falë votave të Armando Ruços së Partisë Konservatore.
Një vit më pas, LSI-ja arriti ta rrëzojë buxhetin, dhe Rama hyri në zgjedhjet e 2011-ës pa buxhet të miratuar.
Në ditët që vijnë pritet të ketë një “provë me nëndetësen 105” në këshillin bashkiak të Tiranës.
Partia Socialiste ka 25 anëtarë në parlamentin e kryeqytetit me 61 këshilltarë. LSI-ja ka 13 anëtarë.
Veliaj i vetëm nuk e ka mazhorancën në këshill. Nëse i bashkon votat e PDIU-së dhe FRD-së së Bamir Topit, numri i këshilltarëve shkon në 29.
Pra, mungojnë vetëm 4 vota për të arritur shumicën në këshill.
Aldrin Dalipi, i cili në fillim e mblidhte këshillin një herë në dy javë, tani ka kohë që nuk e ka thirrur sesionin.
Nëse do të kemi një bashkim votash me opozitën e Bashës në këshillit e Tiranës, vështirë se do të arrihet një shumicë, por gjithsesi do të tronditet koalicioni i ngushtë, që Veliaj e përmend gjithmonë. /tesheshi.com/
