Eileen Macken nga Irlanda, 81 vjeçe, e cila u rrit në një jetimore, arriti të gjejë nënën e saj 103-vjeçare pas 60 viteve të kërkimit!
Macken e kaloi fëmijërinë e saj në një Jetimore të Dublinit, dhe kur ishte 19 vjeçe vendosi të përpiqet që të gjejë nënën e saj biologjike.
Pas dekadave kërkimesh të pasuksesshme, ajo apeloi në një radio irlandeze për ndihmë se kush mund t’i jepte ndonjë të dhënë për nënën e saj, të cilën, sipas llogarive të moshës e konsideronte të vdekur. Dhe në ndihmë të saj erdhi një shkencëtar gjenealogjik. Të dy ata kërkuan për rrënjët e zonjës Macken për një vit.
Dhe, me ndihmën e testimit modern të ADN-së, shkencëtari arriti të gjejë nënën e saj. E, jo vetëm që Eileen zbuloi se kush ishte njeri që e kish sjellë në jetë, por që mbi të gjitha e hasi dhe në jetë, në moshën 103-vjeçare.
“Nuk mund të besoja kur më thanë se është ende gjallë. Ajo së shpejti mbush plot 104 vjet dhe kemi biseduar me telefon…”, tha Eileen për mediat irlandeze.
Ato ende nuk janë takuar pasi jetojnë larg njëra-tjetrës, ndërsa takimi mes tyre pritet me interes të madh mediatik.
Eileen ka mësuar se ajo ka dy gjysmë-vëllezër, të cilët janë rreth 70 vjeç. Ajo gjithashtu tha se tani është personi më i lumtur në botë.
Eileen është në një martesë të lumtur me të shoqin Ronald, me të cilin ka dy vajza dhe një djalë. /tesheshi.com/
