Siç ndodhu këtu e afro 100 vite më parë me luftën e Çanakalesë, ku një ushtri botërore u përball me atë osmane, e ku e fituar doli kjo e dyta, ngjashëm po shfaqen disa nuanca dhe në rastin e Afrinit.
Vullnetarë amerikanë, britanikë dhe gjermanë që luftuan kundër Shtetit Islamik të Irakut dhe Levantit në kuadër të njësiteve kurde në Siri tani ndodhen në provincën e Afrinit për t’iu kundërvënë sulmit turk, tha një zyrtar i forcave demokratike kurde të Sirisë të mërkurën, transmeton Reuters.
Turqia ka kryer një ofensivë në krahinën kurde të Afrinit në ditët e fundit, së bashku me Ushtrinë e Lirë Siriane, të cilën ajo e ka mbështetur më parë, kujton agjensia.
“Ekzistonte një dëshirë e një pjese të luftëtarëve të huaj që luftuan në Raqqa dhe që po luftojnë në Dei Ral-Zora për të shkuar në Afrin”, tha zyrtari i SDF Redur Xelil për Reuters.
Ai nuk pranoi të tregojë se kur kanë shkuar luftëtarët e huaj në Afrin dhe shtoi se bëhet fjalë për “dhjetra” sosh.
“Ata do të luftojnë kundër pushtimit turk. Bëhet fjalë për amerikanë, britanikë, gjermanë … të kombësive të ndryshme nga Evropa, Azia dhe Amerika”, tha Xelil.
Nga ana tjetër, Forcat e Armatosura Turke njoftuan se “tetë terroristë” u vranë në sulmin kundër njësive turke në zonë të martën gjatë Operacionit “Dega e Ullirit”, raportuan mediat lokale.
Më parë, ushtria turke njoftoi se të paktën 250 anëtarë të Partisë së Punëtorëve të Kurdistanit, Partisë së Bashkimit Demokratik, Njësisë Kombëtare të Mbrojtjes dhe ISIL u vranë gjatë operacionit, i cili filloi në fund të javës së kaluar.
Sipas Shtabit të Përgjithshëm Turk, operacioni synon të “krijojë siguri dhe stabilitet përgjatë kufijve turq në këtë rajon, si dhe të mbrojë popullin sirian nga shtypja dhe mizoria e terroristëve”. /tesheshi.com/
