Ministri i Brendshëm, Xhelal Sveçla, ka njoftuar se tetë persona janë arrestuar, një ditë pas shpërthimit në kanalin e Ibër-Lepencit.
Sveçla theksoi dhe më fort se këto sulme dirigjohen nga Serbia dhe për këtë mban përgjegjës Beogradin zyrtar.
“Sulme të vazhdueshme të grupeve kriminale terroriste, siç janë sulmet e fundit me grantë ndaj stacionit policor të komunës se Zveçanit, e tani edhe sulmi i fundit terrorist i ndodhur mbrëmë ndaj infrastrukturës kritike ku u dëmtua rëndë kanali i ujit Ibër-Lepenc, janë sulme të cilat dirigjohen nga Serbia, e ne për këtë mbajmë përgjegjës Beogradin zyrtar”, tha Sveçla para mediave.
Për të, ky sulm cilësohet si sulmi më i rëndë ndaj infrastrukturës kritike që nga përfundimi i luftës.
“Pas këtij sulmi me eksplozviv, i cili cilësohet si sulmi më i rëndë ndaj infrastrkturës kritike që nga përfundim i luftës, sulm i cili akakoi sistemin Iber-Lepenc, përmes të cili bëhet ftohja e termoeletrodave në Obliq dhe furnizimi me ujë të qytetarëve të Mitrovicës së Veriut, asaj të Jugut, Zveçanit, Skenderajt, Drenasit, Fushë Kosovës dhe një pjesë të Prishtinës, të gjitha insitutucionet relevante të Kosovës kanë bashkërenduar aktivitetet e tyre në teren”, ka thënë Sveçla.
Edhe drejtori i Policisë Gazmend Hoxha tha se tri sulmet e fundit në veri janë kualifikuar si “sulme terroriste” që kanë pasur synim ta cenojnë sigurinë e Kosovës. Sipas tij, të arrestuarit mund të kenë lidhje me kryeterroristin Milan Radoiçiç, porse ka shtuar se mbetet punë e hetuesisë për të konfirmuar rolin e secilit të arrestuar.
Ai potencoi tregoi se gjatë bastisjeve kanë konfiskuar mbi 200 uniforma ushtarake, gjashtë zolla, tre granata dore, dy armë AK47, një revole, municion të kalibrave të ndryshëm, fitila ndezës për inicim të lëndëve plasëse, helmeta ushtarake, maska, thika, para dhe pajisje të tjera. /tesheshi.com/
