Një adoleshent i cili u arrestua në rezidencën e kështjellës Windsor të mbretëreshës Elizabeth me një hark të ngarkuar, u deklarua fajtor në një gjykatë në Londër për një shkelje sipas Aktit të Tradhëtisë dhe duke kërcënuar se do të vriste monarken.
Jaswand Singh Chail, 21 vjeç, pranoi akuzat në Old Bailey të Londrës pasi u arrestua i veshur me kapuç, maskë dhe doreza në territorin e kështjellës në Londrën perëndimore rreth orës 8:00 të mëngjesit në ditën e Krishtlindjes 2021.
Elizabeth, e cila vdiq në shtator të vitit të kaluar, ishte në kështjellë atë ditë me djalin e saj dhe tani mbretin Charles dhe anëtarë të tjerë të ngushtë të familjes mbretërore.
“Chail hyri në zonat e mbrojtura në Kështjellën Windsor pasi kërcënoi se do të vriste Madhërinë e saj të ndjerë Mbretëreshën Elizabeth II. Për fat të mirë oficerët ndërhynë dhe askush nuk u lëndua”, tha Nick Price, kreu i Degës së Posaçme për Krimet dhe Kundër Terrorizmit të Shërbimit të Prokurorisë Mbretërore.
“Ishte një incident i rëndë, por fatmirësisht i rrallë”.
“Chail e kishte përgatitur sulmin për muaj të tërë,” thanë prokurorët në një seancë të mëparshme. Kur iu afrua një oficer policie, ai tha: “Unë jam këtu për të vrarë Mbretëreshën.”
Adoleshenti u shfaq në seancën e sotme të gjykatës në Londër me anë të një lidhjeje video i veshur me një xhaketë të zezë dhe foli vetëm për të konfirmuar emrin e tij dhe u deklarua fajtor për tre akuza për kërcënim për vrasje, posedim të një arme dhe një shkelje sipas Ligjit të Tradhëtisë 1842.
Gjykatësi Jeremy Baker tha se do të shpallte dënimin e Chail më 31 mars dhe gjykata urdhëroi përgatitjen e raporteve mjekësore.
Në vitin 1981, Marcus Sargent u burgos për pesë vjet në bazë të Aktit të Tradhëtisë pasi u deklarua fajtor për gjuajtjen me plumba të vërtetë ndaj Mbretëreshës gjatë Trooping the Colour, që mbahej çdo vit në ditëlindjen zyrtare të monarkes, në qendër të Londrës. /tesheshi.com/
