Vetëvrasja është shkaku i gjashtë kryesor i vdekjeve në Bashkimin Evropian ku më shumë se 150 milionë njerëz kanë probleme të shëndetit mendor, sipas Organizatës Botërore të Shëndetësisë (OBSH).
Parlamenti Evropian miratoi Rezolutën për Shëndetin Mendor, qëllimi i së cilës është përmirësimi i infrastrukturës shëndetësore, rritja e disponueshmërisë së shërbimeve dhe stafit profesional dhe zvogëlimi i numrit të vetëvrasjeve me një të tretën deri në vitin 2030.
Eurodeputetët paralajmëruan në rezolutë se arsimimi i shëndetit mendor është shumë i ulët në krahasim me arsimimin e shëndetit fizik, gjë që mund të ndikojë negativisht në prirjen e individëve për të kërkuar ndihmë psikologjike.
Ata shtuan se në shumë shtete anëtare ka barriera për aksesin në shërbime, si kosto shtesë, lista të gjata pritjeje, mungesë specialistësh, stigmatizimi dhe krijimi i pabarazive shtesë socio-ekonomike.
Propozohet krijimi i një strategjie evropiane afatgjatë për shëndetin mendor, duke u fokusuar tek anëtarët e grupeve vulnerabël dhe duke kërkuar zbatimin në sistemet arsimore të shteteve anëtare.
“Vetëvrasjet janë shkaku i gjashtë i vdekjes për banorët e vendeve anëtare të BE,” tha eurodeputetja Sunčana Glavak, një anëtare zëvendësuese e Komitetit që paraqiti raporte mbi shëndetin mendor.
Shkaku i dytë më i zakonshëm i vdekjeve tek të rinjtë në Evropë
Ajo përmendi krijimin e një baze të dhënash cilësore dhe në kohë për vetëvrasjet dhe monitorimin dhe regjistrimin më të mirë të rasteve të vetëlëndimit si një aspekt kyç të trajtimit të këtij problemi.
“Masat synojnë të ulin shkallën e vetëvrasjeve përmes një kombinimi të masave parandaluese, edukimit, përmirësimit të kujdesit për shëndetin mendor dhe raportimit më të përgjegjshëm”, përfundoi ajo.
Vetëvrasja ose vetëlëndimi është shkaku i dytë më i zakonshëm i vdekjes për të rinjtë në Evropë midis moshës 15 dhe 19 vjeç, paralajmëron PE.
Hulumtimet e OSBE-së dhe Komisionit Evropian treguan se 70 për qind e fëmijëve dhe adoleshentëve me çrregullime mendore nuk marrin kujdes shëndetësor adekuat dhe në kohë.
Ankthi dhe depresioni janë çrregullimet më të zakonshme tek të rinjtë dhe prej tyre vuajnë rreth nëntë milionë adoleshentë nga mosha 10 deri në 19 vjeç.
OBSH ka paralajmëruar se përdorimi i tepërt i rrjeteve sociale ndikon negativisht në shëndetin mendor të të rinjve dhe si efekt anësor shfaqet e ashtuquajtura dhuna kibernetike mes bashkëmoshatarëve. /tesheshi.com/
