Në të parin reagim për dosjen me inicialet I. M., si politikani i lartë që figuron ish-spiun Sigurimi, Ilir Meta i hodhi poshtë aludimet se është fjala pikërisht për të. Siç në rastin e videos famëkeqe të 2011-ës, atë me Dritan Priftin, Meta tha se është manipulim nga ana e Autoritetit të Dosjeve.
“Është për të ardhur keq për sjelljen e Autoritetit të manipulimit të dosjeve. Sepse e dinë që çfarë ka të manipuluar në ato dosje”, tha Meta.
Por ai pranoi se në fakultet, koha që korrespondon me faktin e të qënit bashkëpunëtor i Sigurimit të Shtetit, ka qenë Sekretar Rinie. Këtu Meta kalon në delir, duke thënë se ç’prej atëherë kishte aftësi lideri.
“Unë në atë kohë kam qenë vetëm Sekretar i Rinisë së Fakultetit të Ekonomisë, i zgjedhur se isha pothuajse me të gjitha 10-ta, por edhe kisha aftësi si lider që atëherë”, u arsyetuar ai, duke shtuar se në klasë ishin disa Ilir Meta.
“Në klasën time kemi qenë Ilir Metaj. Dhe na e vinin Ilir Rexhep Metaj dhe Ilir… nuk po ia përmend emrin, por jam i sigurt se nuk ka qenë”, tha Meta. /tesheshi.com/
