Partia Demokratike, e cila më 21 qershor 2013 doli forca e dytë e vendit dhe qëndroi në opozitë, vetëm një muaj para zgjedhjeve parlamentare të 25 qershorit hyn me më shumë se gjysmën e pushtetit në vend.
Ndërsa me marrëveshjen Rama-Basha, lideri i PD-së arriti që të vendoste klauzolën e 6 ministrave kryesorë të qeverisë si teknicienë, ai në fund emëroi gjashtë zyrtarë që janë shumë të lidhur me qeverisjen e Partisë Demokratike dhe polet e saj të pushtetit.
Dhe tani PD kontrollon: Presidencën e Republikës, pasi në krye të saj është një nga ish-figurat drejtuese të saj Bujar Nishani; Prokurorin e Përgjithshëm Adriatik Llalla, i cili përveçse një ish-zyrtar pranë PD-së, në këto 4 vjet arriti të përplasej apo të shantazhonte deri dhe ambasadën e SHBA-së, pasi siç tha ai kishte kërkuar arrestimin e disa figurave të larta të PD-së; gjithashtu, opozita që u zgjodh e tillë nga zgjedhësit zotëron Këshillin e Lartë të Drejtësisë, i cili emëron dhe shkarkon gjyqtarët e prokurorët e vendit, ngaqë ky organ përbëhet nga Presidenti, Kryeprokurori, krerët e gjykatave dhe ministri i Drejtësisë, të cilët janë të gjithë eksponentë të Partisë Demokratike; dhe më pas Ministrinë e Brendshme, Ministrinë e Financave, Ministrinë e Arsimit, atë të Shëndetësisë, ministrinë e Arsimit, Ministrinë e Punës dhe Çështjes Sociale.
Pra realisht dhe faktikisht PD ka në duar tre pushtete: Kreun e shtetit, Drejtësinë dhe Ekzekutivin.
Dikush mund të thotë se ata të PD-së janë thjesht ministra pa pushtet, pasi fuqinë reale e ka Edi Rama si kryeministër; por në një mbledhje të thjeshtë qeverie PD-ja është në një pozitë me PS pasi ka 7 anëtarë kabineti me gjithë zv.kryeministren. Kurse PS-ja ka: Ramën, Bushatin Kodhelin, Çuçin, Kumbaron dhe Gjiknurin dhe Gjermenin.
Këta dy të fundit janë ministra pa pushtet real, pasi kanë humbur OSSHE-në dhe ALUIZNI-n si dy mekanizma të rëndësishëm me fonde, të punësuar por edhe të mira “në natyrë”.
Siç po ndodh edhe në ditët e fundit, ministrat e emëruar nuk se po shërbejnë si thjeshtë monitorues por kanë zgjeruar edhe bazën e veprimit në shkarkime dhe largime.
Ministri i Drejtësisë, përveç stafit të këshilltarëve u ka kërkuar largimin vullnetar edhe zyrtarë të tjerë, kryesisht në nivel drejtorie.
Ndërkohë, ministrja e Financave ka paralajmëruar një furtunë në dogana. Ditën e sotme ajo përveç këshilltarëve ka emëruar dhe dy drejtues për rrjetin e serverave të Ministrisë që në këtë sektor është shumë i rëndësishëm pasi çdo gjë në rrjetin e bizneseve bëhet online.
Dukej si e pabesueshme deri vetëm para një jave që të ndodhë diçka e tillë, por ja që u bë vetëm brenda dy orësh.
Është një marrëveshje që duket se ka shuar si me magji çdo akuzë apo sulm ndaj qeverisë a Edi Ramës, George Sorosit apo Saimir Tahirit e ndonjë figure tjetër.
Në rrjetet sociale kanë heshtur të gjithë që deri dje flisnin e flisnin pa pushim.
E këtë e kanë vënë re edhe mjaft zëra të LSI-së apo edhe njeriu më i zellshëm në rrjetet sociale kundër qeverisë, ish-deputeti socialist Andis Harasani, i cili çdo ditë bën nga një status në orë kundër Edi Ramës. Ka disa ditë që i bën edhe kundër Bashës. /tesheshi.com/
