Një nga shumë epitetet që i janë vënë pemës së Krishtlindjeve të ngritur nga Bashkia është “furça e tualetit”, por romanët nuk ngurrojnë të thonë se pema e këtij viti është e zgjebosur, pasi ka humbur të gjitha halat që përbëjnë nje pemë pishe.
Romanët janë tepër të zemëruar me pemën e Krishtlindjeve të vendosur nga Bashkia, të cilën e kanë etiketuar me shumë emra, që më mirë të mos përkthehen. Pema, e cila është tharë dhe ka humbur gjithë halat e pishës, dy javë pasi u ngrit në sheshin qendror të kryeqytetit, piaca Venecia, është bërë simbol i asaj që shumë e shohin si kalbje e përjetshme e qytetit të përjetshëm.
“Eshtë turp. Na lëndohet shpirti vetëm kur e shohim këtë pemë Krishtlindjesh”, thotë një banor i Romës, duke përdorur një term në italisht që sugjeron se pema duket si një pulë e rrjepur.
“Si mund ta vendosin në Romë, në një kryeqyteti si Roma”, thotë një grua.
“Pema e Romës është e thatë, u tha që kur mbërriti në qytet. Është një metaforë për gjendjen e kryeqytetit tonë”, shkroi një banor vendas në Tuiter, ndërsa një tjetër hamendëson: “Kur nis funerali?”
Sipas gazetës italiane “Il Messaggero”, hetimet paraprake thonë se pema nuk ishte mbuluar sipas të gjitha rregullave gjatë transportit prej Dolomiteve në Italinë Veriore, ku është prerë. Disa e kanë quajtur atë “furçë tualeti”, duke shfaqur gjithë ironinë dhe zemërimin që në fakt, nuk ka lidhje me pemën.
Shumë romanë në median sociale kanë vënë në dukje situatën, për sikletin e madh të kryebashkiakes Virginia Raggi, dritës në ngjitje të levizjes anti-tradicionale “Pesë Yjet”, e cila është kritikuar rëndë për gjendjen e vështirë ku gjendet qyteti.
Roma ka rënë në çrregullim dhe degradim në vitet e fundit, me rrugët plot me gropa, grumbuj mbeturinash dhe kopshte të pakujdesura publike ku barërat e këqinj janë rritur aq shumë sa një bojë njeriu.
Edhe papa Francesku ka apeluar për gjendjen e qytetit.
Shpresat se pema prej 20 metrash e këtij viti do të sillte pak atmosferë të gëzuar Krishtlindjesh, u zbeh shpejt. “Duket qartë se është tharë dhe përfaqëson një spektakël të turpshëm për qytetarët dhe turistët”, thotë grupi Codacons.
Codacons, që mbron konsumatorët, apeloi për të hetuar përse u shpenzuan pothuajse 50 mijë euro për të transportuar një pemë të sëmurë drejt Romës nga një pyll në afërsi të kufirit austriak, rreth 700 kilometra larg.
“Pema në Vatikan është shumë më e mirë. Ata duhet t’i ndërrojnë”, thotë një turist francez.
Romanët vë në dukje me xhelozi pemën e mrekullueshme të Krishtlindjeve që është ngritur në zemër të qytetit verior të Milanos, duke e parë atë si një shenjë tjetër sesi kryeqyteti financiar i italisë e ka tejkaluar kryeqytetin zyrtar sa i takon pasurisë dhe prestigjit.
Ndërkohë, saga e “furçës së tualetit” ka nisur rrugëtimin e vet me median sociale, ku ka hashtagun e vet. “Il Messaggero” e shpalli atë një “siklet kombëtar” duke thënë: “Në Rusi, e kanë cilësuar pemën tonë të tharë si një “furçë tualeti”.
Përgatiti: Juli Prifti – /tesheshi.com/
