Nga Mensur Krasniqi
Shqiptarët kanë ndjesi të ndryshme karshi zgjedhjes së Donald Trampit president të SHBA, varësisht konteksteve ku jetojnë. Kështu, në Maqedoni, ata janë të prirur ta shohin me rrezik ardhjen e tij në krye të Shtëpisë së Bardhë, meqë ka shfaqur simpati ndaj Moskës; që do të thotë se mund ta tolerojë politikën sllave në rajon.
Tesheshi.com iu drejtua dy analistëve për të marrë prej tyre opnione mbi atë se cc’ndikime do ketë politika e tij në rajon dhe gjegjësisht mbi shqiptarët.
Selim Ibrahimi: Periudha e qeverisjes së Trumpit mund të quhej: ”Bota e ftohtë që erdhi prej Donald Trampit!”
“Donald Trampi tashmë president i SHBA-ve i ka tejkaluar të gjitha parashikimet e mundshme për të si president i ardhshëm.
Fjalimi tij pas fitores ishte i rezervuar dhe ai bëri thirrje për unitet kombëtar në rindërtimin e Amerikës. Për sa i përket politikës amerikane në Europë dhe Ballkan kjo do të varret nga dinamika e ngjarjeve me të cilat do të ballafaqohet Tramp gjatë mandatit të tij.
Administrata e tij sigurisht që nuk do të përbëhet nga amatorë të cilët do ta linin Ballkanin nën zgjedhjen ruse, por politika e jashtme e Trampit do të ndikohet plotësisht nga Kongresi dhe kërcënimet e jashtme kundër interesit amerikan. Një fakt duhet përmendur se Tramp, mund t’i qaset çështjeve të jashtme dhe problemeve më ndryshe se sa administrata e presidentit Obama.
Duhet parë se si Tramp do të lëvizë në mandatin e tij dhe këtu shqiptarët në Ballkan duhet të përgatiten për një botë të ftohtë që erdhi nga antagonizmi rus dhe stili autoritar i politikanëve lokalë.
Në vija të trasha qasja amerikane për shqiptarët do të jetë e njëjta por ngel tek qendrat politike të shqiptarëve në Ballkan se si do të adaptohen në botën e presidentit Tramp. Politikën e tij të jashtme duhet vlerësuar pas një periudhe dyvjeçare përballë aleatëve dhe miqëve amerikanë. Fushatat elektorale ndryshojnë kur kandidati betohet dhe e merr mandatin. Argumenti tjetër është se analistë të ndryshëm flasin për periudhën e izolimit dhe kufizimit amerikan.
Nëse Amerika do të shkojë drejt kësaj faze historike që dikur në shekullin e XVIII ka qenë aktuale, atëherë sigurisht që për popujt e vegjel që nuk mund të projektojnë forcë do të kishte pasoja, pra edhe për shqiptarët. Në fund në një kohë tjetër, periudhën e qeverisjes së tij do të mund ta vështronim duke thënë: ‘Bota e ftohtë që erdhi prej Donald Trampit!’”, deklaroi për portalin tesheshi, eksperti i politikës së jashtme, Selim Ibrahimi.
Murat Aliu: Nuk mendoj si Edi Rama se me Trampin prishen marrëdhëniet shqiptaro-amerikane
“Sa i përket zgjidhes së Donald Tramp-it president të SHBA-ve duhet cekur se ai është zgjedhur me vullnetin e lirë të qytetarëve amerikanë dhe si i tillë duhet respektuar.
Edhe përkundër paralajmërimeve të tij gjatë fushatës parazgjedhore se nëse zgjidhet president i SHBA-vë do të bëj ndryshime rrënjësore në shumë fusha, mendoj se një gjë e tillë nuk do të ndodhë. Mendoj se sistemi juridiko-politik në SHBA është i konsoliduar mjaftueshëm dhe nuk ka shumë hapësirë për ndryshime radikale. E njëjta gjë vlen edhe për politikën e jashtme të SHBA-ve nën udhëheqjen e Trampit.
Përveç disa ndyshimeve minore nuk mendoj se do të ketë ndonjë ndryshim radikal edhe në këtë drejtim. Sepse parametrat e politikës së jashtme të SHBA-ve janë vendosur shumë më herët dhe vërtetë është vështirë të ndryshohen ata. Unë personalishtë në këto kontekst e interpretoj edhe deklaratën e kryeministrit shqiptar, Edi Rama, ku ai para disa ditëve deklaroi se nësë Tramp zgjidhet president i SHBA-ve do të prishen marëdhëniet shqiptaro-amerikane.
Pra, nuk jam i mendimit se me zgjidhjen për president të Trampit do të prishen këto marrdhënie, sepse është një kohë e gjatë që SHBA-të shqiptarët i llogarisin një partner strategjikë dhe një popull të besueshëm në Ballkan. Përveç kësaj SHBA-të qe prej viteve ‘90 kanë bërë një investim të madh në Ballkan, veçenarisht ndër shqiparë. Prandoj gjithë ky investim nuk mundë të shkoj huq aty për aty”, deklaroi për tesheshi.com politikologu, Murat Aliu. /tesheshi.com/
