Projektit “Ballkan i Hapur” i është shtuar “me zë” si përkrahës një tjetër emër në rajon nga politika shqiptare. Eshtë Ali Ahmeti.
Duke folur për “Balkan Talks” në Euronews Albania, ai arsyetoi se asnjë nga shtetet e Ballkanit Perëndimor nuk do të dalë i humbur nëse i bashkohet kësaj nisme.
“Ne nuk kemi hyrë në këtë projekt pa e menduar, pa e analizuar dhe në këtë projekt ne kemi pasur konsensus etnik dhe politik.
Jemi dakordësuar për këtë çështje. Asgjë nuk humb as Maqedonia, as Shqipëria, as ndonjë vend që mund të bashkohet.
Marrëveshja nuk është e imponueshme, e dhunshme, është që të pranosh atë që mendon se është e drejta.
Ne kemi vlerësuar se Ballkani i Hapur në dobi të shtetit dhe të rajonit, por pa ua imponuar të tjerëve”, tha Ahmeti.
Gjithsesi, qëndrimi i tij nuk luan rol në zgjerimin e mëtejshëm të projektit rajonal, pasi vetë Maqedonia është prej atyre që i janë bashkuar pa dilema dyshes iniciuese Rama-Vuçiç.
Sipas një teori konspirative, nga ata që e kundërshtojnë “Ballkanin e Hapur”, është ajo sa pas tij fshihet një përpjekje për të krijuar “Jugosllavinë e re”. /tesheshi.com/
