Kryeredaktori i gazetës Nova Gazeta dhe fituesi i çmimit Nobel për Paqen, Dmitry Muratov është i shqetësuar se deri ku do të shkojë Kremlini në konfliktin e tij me Perëndimin.
“Dy breza jetuan pa kërcënimin e luftës bërthamore. Por ajo periudhë ka mbaruar. A do ta shtyp Putin butonin bërthamor apo jo? Kush e di? Askush nuk e di. Asnjë person në botë nuk mund ta thotë këtë me siguri,” tha Muratov në intervistën për BBC.
Që kur Rusia nisi pushtimin e saj në Ukrainë në shkurt 2022, zhurma e armëve bërthamore ka qenë e zhurmshme dhe e shpeshtë nga Moska.
Zyrtarët e lartë të saj filluan të thonë, pa delikatesë, se vendet perëndimore që armatosin Ukrainën nuk duhet ta irritojnë shumë Rusinë. Pak ditë më parë, presidenti rus Vladimir Putin njoftoi planet për të vendosur armë bërthamore taktike në Bjellorusi.
Më pas, një nga bashkëpunëtorët e tij më të ngushtë, Nikolai Patrushev, paralajmëroi se Rusia ka “një armë moderne unike të aftë për të shkatërruar çdo armik, përfshirë SHBA-në”.
A është bllof dhe mburrje apo kërcënim për t’u marrë seriozisht? Muratov thekson se ka vërejtur shenja shqetësuese brenda Rusisë.
“Propaganda shtetërore i përgatit njerëzit të mendojnë se lufta bërthamore nuk është gjë e keqe. Këtu në kanalet televizive po promovohen lufta bërthamore dhe armët bërthamore sikur të ishin reklamë për kafshët shtëpiake”, thotë Muratov në një intervistë për BBC dhe shton:
“Ata shpallin se ‘ne kemi këtë raketë, atë raketë, një lloj tjetër rakete’. Ata flasin për shënjestrimin e Britanisë së Madhe dhe Francës, për shkaktimin e një cunami bërthamor që do të përlajë Amerikën. Pse e thonë këtë? Për t’jua bërë normale njerëzve”, thotë Muratov.
Kohët e fundit, në televizionin shtetëror rus, një drejtues i shquar talk shoë sugjeroi që Rusia të shpallte çdo objektiv ushtarak në territorin e Francës, Polonisë dhe Mbretërisë së Bashkuar si një objektiv legjitim për Rusinë.
“Propaganda është një lloj rrezatimi. Të gjithë janë të ndjeshëm ndaj saj, jo vetëm rusët. Në Rusi ka propagandë në 12 programe televizive, në dhjetëra mijëra gazeta, në rrjetet sociale si VK (versioni rus i Facebook), dhe e gjithë kjo i shërben plotësisht ideologjisë së shtetit”, shtoi Muratov. /tesheshi.com/
