Fiks një javë më parë, pra 24 orë nga betimi i Donald Trump si president i SHBA-së, në Tiranë nisi një bombardim i rrjetit dhe disa portaleve me lajmin se është shkarkuar edhe Donald Lu, “njeriu i George Soros në Shqipëri”.
Ata që katër vjet më parë e cilësonin Lu-në si “shpëtimin” nga “i tmerrshmi” Arvizu, ambasadorin e fundit e bënë më keq dhe më zi se të gjithë të parët.
“Është i lidhur kokë e këmbë me Edi Ramën dhe do largohet”, thanë qarqet e afërta dhe dukshëm të lidhura me tre fije: Sali Berishën, Ilir Metën por edhe njerëzit e gjyqësorit, kryesisht Prokurorisë së Përgjithshme.
Por Donald Lu ka vepruar pikërisht një javë pas instalimit të administratës “Trump”, duke treguar qartë se nuk ka ndryshim qëndrimi.
Grupi i formuar nga një prokuror federal i SHBA dhe një agjent i FBI-së kanë mbushur dosjen për një figurë shumë të lartë në Prokurorinë e Përgjithshme, duke i anuluar vizën për në Shtetet e Bashkuara të Amerikës.
Bëhet fjalë për një zyrtar me shumë peshë, ne qendër të zhvillimeve prokuroriale, përfshirë dhe pozitën e lartë që gëzon në krye të organit të akuzës, dhe që edhe një vit më parë u përplas me ambasadën amerikane kur deklaroi se po vizitonte SHBA-në i ftuar nga FBI-a, po që në fakt merrte pjesë në një shoqatë të juristëve amerikanë.
Pra bëhet fjalë jo thjesht për mosdhënie vize, por revokim të vizës së dhënë më parë, për anulim pra, ndërkohë që më parë i është dhënë.
Dhe vetë teksti i ambasadës tregon se bëhet fjalë për vizë zyrtare, për një zyrtar të prokurorisë dhe jo thjesht një punonjës së saj.
Ja ç’thuhet në tekstin e ambasadës së SHBA:
“Ambasada e Shteteve të Bashkuara e ka ndërmarrë këtë veprim përpara procesit të pritshëm të vetingut, i cili do të vlerësojë lidhjet e zyrtarëve të caktuar me korrupsionin, si dhe në përgjigje të një rasti që përfshinte abuzim flagrant të një vize zyrtare nga një prokuror i nivelit të lartë dhe bashkëshortja e tij, gjë që çoi në revokimin e vizave të tyre.
Ambasada e Shteteve të Bashkuara i merr seriozisht akuzat për korrupsion dhe do të vazhdojë t’i shqyrtojë vizat dhe aplikimet për vizë të zyrtarëve të drejtësisë me vëmendje të shtuar. Departamenti i Shtetit ka një autoritet të gjerë për të mohuar dhe revokuar viza bazuar në informacione që tregojnë se zotëruesi i vizës mund të jetë i papranueshëm në Shtetet e Bashkuara dhe Departamenti i Shtetit do të vazhdojë ta përdorë këtë autoritet për të çuar përpara përpjekjet kundër korrupsionit në Shqipëri”.
Dhe siç mësohet për këtë prokuror të pajisur me vizë së bashku me bashkëshorten është zhvilluar një hetim që e ka ndjekur këmba-këmbës në SHBA me anë të një grupi special të FBI-së.
Prej një muaji pas qëndrimit të tyrë në Shqipëri, katërshja ndërkombëtare e antikorrrupsionit, dy nga SHBA dhe dy nga vendet e BE-së kanë plotësuar një dosje të plotë për veprimtarinë e gjykatësve dhe prokurorëve shqiptarë.
Ata janë katër, përkatësisht dy meshkuj dhe dy femra; një prokurore rumune, një nga Kroacia, një agjent i FBI dhe një prokurori i SHBA-së.
Secili ndjek një rol të caktuar dhe do të jenë “muskotierët” e drejtësisë së re.
Dy prokuroret nga Kroacia dhe Rumania dhe ai nga SHBA do të asistojnë Prokurorinë Speciale, ndërsa agjenti i FBI-së do të asistojë Byronë Kombëtare të Hetimit.
Agjenti i FBI-së që do jetë pjesë e Byrosë është Robert Beckman. Ai është një oficer me 30 vite përvojë, kryesisht në luftën antikorrupsion.
Ndërkohë, bashkë me të në Tiranë ndodhet dhe Prokurori Federal i Shteteve të Bashkuara, Mark Chutkow. Edhe ai ka shumë përvojë dhe do asistojë në gjetjen e parave të pista dhe të fshehura jashtë vendit.
BE-në e përfaqësojnë dy femra. E para është Florentina Mirica, e cila është prokurore në Rumani.
Mirëpo ditën e djeshme, menjëherë pas qëndrimit të ambasadës, ka pasur disa sulme rresht ndaj Donald Lu-së dhe më pas ambasadores së BE-së në Tiranë, Romana Vllahutin.
Një portal që ndodhet shumë pranë familjes së Berishës dhe me lidhje të forta në Prokurorinë ka bërë dy komente rresht ambasadorit Lu dhe gjithashtu tre shkrime ndaj Vllahutin.
Pra janë sulmuar më shumë se Edi Rama. Kjo për arsye se dy ambasadorët dhe jo Rama e kanë fuqinë për zbatimin e vettingut dhe kërcitjeve të prangave të mëdha…/tesheshi.com/
