Koreja e Veriut lëshoi një raketë balistike në det pranë bregut të saj lindor, përpara stërvitjeve të planifikuara ushtarake nga forcat koreano-jugore dhe amerikane që përfshijnë një aeroplanmbajtëse, si dhe një vizitë në rajon nga zëvendëspresidentja e SHBA-së, Kamala Harris.
Ushtria e Koresë së Jugut tha se ishte një raketë balistike me rreze të shkurtër e lëshuar nga zona Taechon në provincën Pyongyang të Koresë së Veriut pak para orës 7:00 të mëngjesit.
Ministri japonez i Mbrojtjes Yasukazu Hamada tha se Japonia vlerësoi se kishte arritur një lartësi maksimale prej 50 km dhe mund të ketë qenë duke fluturuar në një trajektore të parregullt.
Ai shtoi se raketa ra jashtë zonës ekskluzive ekonomike të Japonisë dhe se nuk kishte raportime për probleme me transportin detar apo ajror.
Nisja e nëntëmbëdhjetë
Shumë nga raketat me rreze të shkurtër veprimi që Koreja e Veriut ka testuar vitet e fundit janë të dizajnuara për t’iu shmangur mbrojtjes raketore duke manovruar gjatë fluturimit dhe duke fluturuar në një trajektore më të ulët, në zbritje, thonë ekspertët.
“Nëse përfshini lëshimet e raketave lundruese, ky është lëshimi i nëntëmbëdhjetë, që është një ritëm i paprecedentë. Veprimi i Koresë së Veriut përbën një kërcënim për paqen dhe sigurinë e vendit tonë, rajonit dhe komunitetit ndërkombëtar dhe ta bësh këtë ndërkohë që po ndodh pushtimi i Ukrainës është e pafalshme”, tha Hamada.
Ai shtoi se Japonia dërgoi një notë proteste përmes ambasadës së Koresë së Veriut në Pekin.
Mbërritja e një aeroplanmbajtëseje amerikane
Komanda e SHBA-së Indo-Paqësorit tha se ishte në dijeni të lëshimit dhe ishte duke u konsultuar ngushtë me aleatët, duke riafirmuar angazhimin e Amerikës për mbrojtjen e Koresë së Jugut dhe Japonisë.
“Ndërsa ne kemi vlerësuar se kjo ngjarje nuk përbën një kërcënim të menjëhershëm për personelin apo territorin amerikan, apo për aleatët tanë, lëshimi i raketës nënvizon efektin destabilizues të armëve të paligjshme të shkatërrimit në masë të Koresë së Veriut dhe programeve të raketave balistike”.
Nisja pasoi mbërritjen e aeroplanmbajtëses amerikane me energji bërthamore “USS Ronald Reagan” në Korenë e Jugut për të marrë pjesë në stërvitjet e përbashkëta me forcat e Koresë së Jugut dhe përpara vizitës së planifikuar të Kamala Harris në Seul këtë javë.
Sanksione shtesë
Ishte hera e parë që Koreja e Veriut kreu një lëshim të tillë që kur lëshoi tetë raketa balistike me rreze të shkurtër veprimi në një ditë në fillim të qershorit, duke bërë që Shtetet e Bashkuara të kërkojnë sanksione shtesë për shkeljen e rezolutave të Këshillit të Sigurimit të OKB-së.
Koreja e Veriut ka hedhur poshtë rezolutat e OKB-së si shkelje të së drejtës së saj sovrane për vetëmbrojtje dhe eksplorim hapësinor dhe ka kritikuar stërvitjet e mëparshme të përbashkëta midis SHBA-së dhe Koresë së Jugut si dëshmi e politikave të tyre armiqësore.
Stërvitjet janë kritikuar edhe nga Rusia dhe Kina, të cilat u kanë bërë thirrje të gjitha palëve të mos ndërmarrin hapa që rrisin tensionet në rajon.
Pasi Koreja e Veriut kreu një numër të paprecedentë testesh raketore në fillim të këtij viti, duke përfshirë raketat e saj balistike ndërkontinentale për herë të parë që nga viti 2017, SHBA dhe Koreja e Jugut thanë se do të shtojnë stërvitjet e përbashkëta dhe shfaqjet ushtarake të fuqisë për të penguar Phenianin. /tesheshi.com/
