Më 1 shtator në Maqedoninë e Veriut do të hyjnë në fuqi masat që duhet të mundësojnë kursim të energjisë elektrike deri në 15 për qind, ndërsa qeveria ka përcaktuar rekomandime kursimi për familjarët dhe kompanitë, si dhe detyra specifike për institucionet shtetërore, transmeton televizioni Sitel.
Në seancën e pritshme të qeverisë së Maqedonisë duhet të merret vendim për shpalljen e krizës në sektorin energjetik. Për momentin nuk ka njoftime për kufizime, ndërsa qeveria paralajmëron rritje të prodhimit.
Masat ndahen në disa kategori, varësisht nëse janë për familjarë, kompani apo objekte, konkretisht institucione dhe ndërmarrje shtetërore, sqaroi ministri i Ekonomisë Kreshnik Bekteshi.
Fikja e ndriçimit dekorativ në ndërtesat publike dhe monumentet e kulturës, fikja e llambave kur ka dritë të mjaftueshme, ftohja me kondicioner në një temperaturë jo më të ulët se 27 gradë dhe ngrohja në një temperaturë jo më të madhe se 20 gradë, fikja e kompjuterave pas punës, ndërrimi i filtrave në pajisjet e ngrohjes dhe ftohjes, shfrytëzimi sa më shumë i dritës së diellit, janë vetëm një pjesë e detyrave të vendosura për institucionet shtetërore.
Familjeve u rekomandohet ndezja e bojlerit vetëm kur ka nevojë për ujë të ngrohtë dhe pastaj përdorimi racional i elementeve të ngrohjes.
Udhëzohet komuniteti i biznesit të fikë ndriçimin dekorativ në të gjitha objektet, të mos përdorë ndriçimin në ambientet e brendshme, salla dhe zyra gjatë periudhës kur ka dritë të mjaftueshme, ngrohje dhe ftohje racionale me kondicioner, etj.
Nëse nuk arrihet qëllimi për kursim 15 për qind të energjisë elektrike, Bekteshi bëri të ditur se do të pasojnë sanksione për drejtuesit e institucioneve në përputhje me kodin e etikës.
Çdo datë 15 të muajit, duke filluar nga shtatori, do të publikohen publikisht faturat e energjisë elektrike të institucioneve shtetërore. Qëllimi nuk është vetëm që qytetarët të kenë njohuri për konsumin, por edhe të dinë nëse janë përmbushur detyrimet e qeverisë në lidhje me kursimet. Ministria e Ekonomisë do të publikojë raportet e institucioneve për energjinë e konsumuar.
Drejtori i përgjithshëm i Elektran Maqedonia e Veriut, Vasko Kovaçevski, paralajmëroi rritje të prodhimit të energjisë elektrike, duke thënë se planifikohet që nga nëntori të jenë në funksion tre njësi në Manastir. Gjithashtu do të bëhet përpjekje që remontet klasike të mos kryhen me ndërprerje prodhimi 30, 60 apo 90 ditë, por të kryhen në periudha kur ka ulje të konsumit.
Në periudhën janar-korrik të këtij viti termocentralet e Maqedonisë së Veriut kanë prodhuar 15 për qind më shumë energji elektrike se në të njëjtën periudhë të vitit 2021. Plani i prodhimit për këtë vit parasheh rritje prej 20 për qind krahasuar me vitin e kaluar. /tesheshi.com/
