Përfshirja e popullit me vargje kushtuar politikës së ditës, siç ndodhi së fundi dhe me një krijim kushtuar refomës në drejtësi, është diçka e trashëguar edhe nga koha e komunizmit. Të kuptohemi, nuk është ekskluzivitet i kësaj epoke, por gjatë saj, “autori popull” u shfrytëzua më së miri edhe në funksion të propogandës së sistemit.
Më të veçantat në albumin e madh të “vargjeve të popullit kushtuar partisë”, njihen ato për Sigurimin e Shtetit, pak të njohura për publikun, siç kjo:
Një mëngjes së ç’u gdhi fshati,
oh ç’të madh kemi gëzim,
arrestohet sot Nevzati,
të këndojmë për sigurimnë…
Vranishit, Vlorë
Por ndërkohë, meqë jemi ende nën atmosferën e reformës në drejtësi, e cila sapo është miratuar në parlament, gjejmë se ndër qindra krijime, paska dhe një pikërisht me temë “reformën”, ose më saktë reformat. Ato të ndërmarra nga komandanti:
Shqipëri, bahçe me lule,
të bukur klime që ke,
Po ndërton socializmin,
Si në mal, në Muzeqe.
Rrofsh o komandanti ynë,
doli fjala që na the,
bëre reforma të shumta,
popullin e garantove.
Në çdo anë të Shqipërisë,
në radio dëgjohet – e,
rroft’ Enveri dhe Partia
që çelën rrugën e re.
Greshicë, Fier
Kështu që, për të gjithë ata që mendojnë e kanë bindjen se Shqipëria ende nuk është shkëputur nga ca shfaqje komuniste, tek këto vargje të djeshme, të cilat i hasim të aktivizuara edhe sot, kanë një argument plus për qëndrimin e tyre.
Dhe nuk është e thënë që gjithçka t`i faturohet të majtës në gjithë këtë mesele. Mjaftojne krijimet rapsodike për Sali Berishën, për ta konsideruar si tejet “konsensuale” dëshirën e dy kahjeve politike për ta gjetur veten tek “gurra krijuese” e popullit. /tesheshi.com/
