Një përplasje mes vetë ballistëve është shfaqur në ceremoninë e përkujtimit të betejës së Gërhotit në Gjirokastër, aty ku 76 vite më parë u vra Hysni Lepenicai Ballit, pas një përballje të armatosur me komunistët.
Kjo pasi përfaqësues të Ballit Kombëtar të drejtuar nga Adriatik Alimadhi, aktualisht deputet prej “opozitës së re”, nuk qenë dakort që në ceremoni të ishte prezent Artur Roshi i Ballit Kombëtar Demokrat, duke e cilësuar madje këtë të fundit edhe si tradhëtar. Ndërkohë, PD-ja lokale nuk mbajti anën e askujt. Kreu i saj Dash Aliko e interpretoi kështu incidentin, sipas asaj çfarë raporton shqiptarja.com:
“Këtë e organizonte PD-ja e Gjirokastër ku ishte i pranishëm Enkeled Alibeaj dhe Luan Baçi, Nebil Çika, kryetari i shoqatës së persekutuarve. Në këtë moment vjen Roshi i Ballit Kombëtar Demokrat që nuk ishte i ftuar. Një grup prej 10 personash, që mendoj se janë të organizuar nga Alimadhi, iu drejtuan Roshit me fjalët “tradhtar” dhe aty filloi gjithë përçarja dhe ai debat i panevojshëm në këtë ceremoni. Ishte një grup me origjinë nga Vlora, por mendoj se ata ishin të organizuar nga Alimadhi dhe të gjithë të tjerët. Këtë ceremoni e ka organizuar PD-ja, të pranishëm ishin familjarë, kryetari i të persekutuar të Shqipërisë, Gjirokastrës, të Tepelenës”, deklaroi Aliko.
Kjo përplasje mes ballistësh, të ndarë që para viteve 2000, përçon pikërisht atë të atyre viteve, ku njëri Ball drejtohej nga Hysen Selfo e tjetri nga Shpëtim Roqi. Ky i fundit në një rast madje, u tall me Selfon e thyer në moshë, duke i kujtuar se nuk lante dhëmbët. /tesheshi.com/
