Nga Bashkim Kastrati
Kosova aktualisht nuk zbaton asnjë skemë sociale apo përfitime për fëmijët. Kjo temë zakonisht është diskutuar në kohë të fushatave zgjedhore.
Së fundmi një grup i deputetëve po kërkon të aplikohen shtesat për të gjithë fëmijët e Republikës së Kosovës – pagë sociale – një nevojë urgjente edhe për zbutjen e varfërisë te familjet në nevojë. Në këto propozime fillestare, thuhet se në këto skema do të përfshiheshin fëmijët nga 0 – 16 vjeç.
Sipas të dhënave të organizatave joqeveritare që merren me të drejtat e fëmijëve, thuhet se në Kosovë rreth 33 për qind e fëmijëve jetojnë në varfëri. Po këto të dhëna thonë se mbi 10 për qind e fëmijëve janë të përfshirë në punë, kurse rreth 7 për qind punojnë punë të rënda apo të rrezikshme.
Organizatat joqeveritare që merren me mbrojtjen e të drejtave të fëmijëve, kanë kërkuar disa herë nga ekzekutivi që të rishikohet skema sociale dhe në kuadër të saj, të vendosen edhe shtesat për fëmijë.
Nga kjo nismë do të përfitonin rreth 500 mijë fëmijë, nga mosha 0 deri në 16 vjeç, me nga 10 deri në 40 euro në muaj varësisht numri i fëmijëve. Si kosto totale, vlera e shtesave të fëmijëve mund të arrijë në tre për qind të buxhetit të përgjithshëm të Kosovës.
Duke marrë parasysh situatën sociale në Kosovë, nisma për shtesat e fëmijëve pritet nga prindërit në Kosovë.
Antigona Hoti është një nënë nga Prishtina. Ajo i ka dy fëmijë dhe thotë se i ka kryer studimet në Fakultetin Juridik në Universitetin e Prishtinës “Hasan Prishtina”, por që ende nuk ka gjetur punë. Ajo thotë se nëse shteti do të jepte shtesa për fëmijë do të përmirësohej mirëqenia e familjes së saj.
“Në familjen tonë vetëm burri punon dhe është e vështirë me një rrogë që t’i përballojmë shpenzimet e jetës. Një ndihmë nga shteti do të ishte shumë e mirëseardhur, sepse do të na ndihmonte në përballimin e kostos së jetës së përditshme, por edhe për mirëqenien e fëmijëve”, thotë Antigona.
Ndërsa Berat Sylaj thotë se shtesat për fëmijë duhet të ndahen dhe se një gjë e tillë është bërë para disa dekadave dhe duhet të bëhet ende.
“Shtesat për fëmijë i kemi marrë edhe në kohën e Jugosllavisë dhe ato janë elementare për një shtet dhe shoqëri që të funksionojë si duhet. Këta po thonë që nuk kemi para, por nuk duhet një shumë e madhe për të ndarë shtesat për fëmijë. Ato para janë më pak se ato të veteranëve. Vetëm me këto 53 milionë euro që ja falen Bechtel – Enkas, disa vite kishin mund paguhen shtesat e fëmijëve”, thotë Sylaj.
Ai thotë se përmes këtyre shtesave investohet në të ardhmen e fëmijëve në kuptimin e rritjes së mirëqenies dhe edukimit të tyre në kushte sa më të mira, gjë që ndikon edhe në zhvillimin dhe avancimin e shoqërisë kosovare në përgjithësi.
Përfitimet materiale për fëmijët ka qenë premtimi i Aleancës për Ardhmërinë e Kosovës, e cila është aktualisht në koalicion qeverisë dhe udhëheq me Qeverinë e Kosovës. Premtime të tilla ka pasur edhe nga parti të tjera pjesëmarrëse në zgjedhjet e fundit. Kurse, ish-kryetari i Partisë Demokratike, tashmë president i Kosovës, Hashim Thaçi, kishte premtuar 300 euro për çdo fëmijë të sapolindur, premtim ky që nuk është realizuar asnjëherë. /tesheshi.com/
