-Një bisedë me Gjergj Zefin, drejtuesin e atëhershëm të PAD-së dhe dëshmitar në ngjarje-
Botimi i një pjesë të rrëfimit të Liri Lubonjës, ku nxirrte në pah riciklimin e disa prej xhelatëve të komunizmit në “demokracinë” e pas vitit 1990, po hap çdo ditë fakte dhe plagë, të cilat tronditën shoqërinë, dhe pse jo ndoshta u bënë galvanizuese të zgjatjes pa mbarim të tranzicionit shqiptar.
Një e tillë është pikërisht një vrasje politike në Shkodër e ndodhur në vitin 1994, e cila lidhet pikërisht me personazhin që përmend Liri Lubonja në kujtimet e saj: deputetin e Partisë Demokratike: Shyqyri Çela.
Në janarin e vitit 194, u vra pas një aktiviteti të Aleancës Demokratike në Shkodër, Gjovalin Çekini, një mbështetës i atëhershëm i PAD-së, vrasje që tronditi ekuilibrat në Shqipëri, frikësoi edhe më tepër njerëzit dhe autoritarizmi u rrit.
Me radhë u goditën: Servet Pëllumbi e Arben Imami, Gjergj Zefi dhe Edi Rama, Ndre Legisi dhe shumë intelektual e gazetarë.
Gjergj Zefi, aktualisht gazetar e botues, në vitin 1994 ishte numri dy i PAD-së. Ai e konsideron si një ngjarje kyçe vrasjen e Gjovalin Çekinit që i vuri vulën një demokracie të dhunuar.
Zoti Zefi, si e konsideroni vrasjen e Gjovalin Çekinit, a ishte vrasja e pare politike pas pluralizmit?
Jo nuk është vrasja e parë politike pas pluralizmit. Vrasjet e para me koperturë politike janë ato të 2 Prillit që ndodhën po në Shkodër, që asokohe ishte kthyer si në një qendër të manipulimit nga njerëzit e sigurimit të shtetit që donin të ruanin (dhe ia arritën) kontrollin mbi Partinë Demokratike dhe hegjemoninë mbi politikën shqiptare.
Pas vrasjeve të 2 Prillit 1991, në Shkodër mori fund pluralizmi, ende pa lindur mirë, u instalua terrorizmi politik, lulëzuan bandat politike që mbanin nën terror qytetin me grykët e armëve, të cilat u pasuruan duke grabitur prona private dhe shtetërore. Filloi një erë e re, e dhunës politike e cila në forma të tjera, më të sofistikuara vazhdon edhe sot. Në kohën për të cilën po flasim nuk bëhej fjalë për tubime politike të tjera përveç atyre të Partisë Demokratike. Në këto kushte, në 14 Janar të 1994, në përvjetorin e pestë të demostratës së parë antikomuniste, në një atmosferë të njëjtë terrori, u zhvillua tubimi i parë i Aleancës Demokratike, në Teatrin “Migjeni”. Qindra djem të guximshëm u mblodhën sërish për të vrarë frikën dhe e bukura ishte se 80 % e tyre ishin të njëjtët që kishin qenë në demonstratën kundër Stalinit. Në Janarin e 94 ata u ngritën kundër terrorit të Partisë që vetë e ngritën katër vjet më parë e që ua kishin marrë peng sigurimsat…
Gjovalin Çekini ishte një gavrosh i lirisë, ai nuk ishte politikan që vrasjen e tij ta konsideroj politike, por ishte një djalë i fortë që aspironte lirinë, dhe që u bë theror i politikës.
Vrasja ishte si pasojë e nervozizmit të bandave që nuk mund ta pranonin karshillëkun që po ju bëhej në mes të Shkodrës. Që pas 2 Prillit të 91 ishte hera e parë që në atë qytet flitej në publik kundër “sulltanit” të tyre, Sali Berishës.
Në atë kohë ishte si koncept prishja e takimeve nga pushteti, a ishte e organizuar vrasja dhe cili është roli i vëllait të Shyqyri Çelës, i cili në atë kohë ishte zyrtar i lartë i policisë?
Vëllai i Shyqyri Çelës ishte i pirë në atë takim, natyrisht i shtyrë nga sigurimsat, shokët e tij, dhe u përdor në atë vrasje. Ai u përplas me gavroshët , të cilët i dhanë një mësim të mirë. Por të gjithë antimitingashët kishin ardhur të armatosur . Ai nxori pistoletën, por vrasjen e bëri një person tjetër, me emrin Gjovalin Bari, një bandit i pushtetit, krahu i armatosur i Ali Kazazit, dhe i Ali Spahisë, në atë kohë njerëzit që kishin uzurpuar jetën politike të qytetit.
Qenia vëlla i Shyqyriut, bëri që gjërat të precipitonin në rrjedhën e strukturave të Sigurimit të Shtetit. Shyqyriu me Preçin(Zogajn) gatuan një çorbë nga e cila asnjëri nuk u dënua dhe gjaku i Gjovalinit u shit, siç ndodh rëndom në precedentë të tillë me koperturë politike…
Përgatiti: Ylli Pata –/tesheshi.com/
