Ministrja çeke e Mbrojtjes Jana Cernochová tha të premten se ajo nuk do të marrë pjesë në një takim të Grupit të Vishegradit, një shoqatë e katër shteteve sovrane të Evropës Qendrore – Hungaria, Sllovakia, Republika Çeke dhe Polonia.
“Personalisht, nuk do të shkoj në Hungari për një takim të ministrave të mbrojtjes së V4 (e mërkurë – të enjte). Ata kanë zgjedhje javën tjetër dhe nuk është e denjë të marrim pjesë në fushatën atje. Unë gjithmonë e kam mbështetur V4 dhe më vjen shumë keq që nafta më e lirë ruse është më e rëndësishme për politikanët hungarezë se gjaku ukrainas”, ka postuar Chernochová në Twitter me hashtag #SlavaUkraini.
Kujtojmë: presidenti ukrainas Volodymyr Zelensky të enjten u bëri thirrje liderëve të NATO-s që të rrisin mbështetjen ushtarake për vendin e tij, duke i paralajmëruar ata se objektivi i ardhshëm rus mund të jenë anëtarët e NATO-s në Evropën Lindore, përfshirë Poloninë. Gjatë një fjalimi emocional drejtuar liderëve të BE-së në të njëjtën ditë, Zelensky i bëri thirrje në mënyrë specifike kryeministrit hungarez Viktor Orban.
“Dëgjo, Viktor, a e di se çfarë po ndodh në Mariupol?”, e pyeti Zelenski Orbanin, i cili është afruar më shumë me Kremlinin vitet e fundit.
“Një herë e përgjithmonë, ju duhet të vendosni se në cilën anë jeni”, tha Zelensky në një video të transmetuar nga liderët e BE-së të mbledhur në një samit në Bruksel. Përveç kësaj, Zelensky i bëri thirrje Hungarisë, e cila është shumë e varur nga energjia ruse, të pezullojë tregtinë me Moskën.
Sanksionet më të forta ndaj Rusisë dhe dërgimi i armëve vdekjeprurëse në Ukrainë janë kundër interesave të Hungarisë, u përgjigj të premten kryeministri Viktor Orban.
“Hungaria dëshiron të qëndrojë jashtë kësaj lufte dhe nuk do të lejojë transferimin e armëve në Ukrainë,” tha Orban, sipas zëdhënësit të qeverisë së tij Zoltan Kovacs.
Që nga fillimi i pushtimit rus të Ukrainës, Budapesti ka pranuar refugjatë, por ka refuzuar të dërgojë ndihmë ushtarake dhe ka ndaluar transferimin e armëve në të gjithë territorin e tij.
Orban dënoi pushtimin rus të Ukrainës, por nuk kritikoi hapur presidentin Vladimir Putin dhe kundërshtoi fuqishëm sanksionet ndaj energjisë ruse.
“Nëse mbyllim rubinetin e naftës dhe gazit, do t’i vendosim kostot e luftës mbi kurrizin e familjeve hungareze,” tha Kovacs të premten. “Ne nuk mund ta përballojmë atë”.
Orban po përgatitet për zgjedhjet parlamentare të 3 prillit, në të cilat gara do të jetë shumë e ngushtë pasi opozita për herë të parë kandidon me një kandidat të vetëm.
Ishte lideri i opozitës Peter Marki-Zay që lexoi nga fjalimi i Presidentit Zelensky-it, tha se Viktor Orban ishte “i izoluar”. Ai tani shihet si (aleati i fundit i Vladimir Putin) brenda BE-së dhe NATO-s”, tha Marki-Zay.
Lideri i partisë polake në pushtet, Jaroslaw Kaczynski, nuk është i kënaqur me deklaratat e kryeministrit hungarez, por theksoi se do të presim dhe do të shohim se çfarë do të ndodhë pas zgjedhjeve parlamentare në Hungari në prill.
“Nëse më pyesni nëse jam i kënaqur me këtë, nuk jam, por do të pres zgjedhjet, do të shohim pas zgjedhjeve”, tha Kaczynski për radion polake lihur me qëndrimin e Orbanit ndaj Rusisë. /tesheshi.com/
