Një peticion online që ka mbledhur më shumë se 560.000 nënshkrime e që kërkon t’i ndalojë hyrjen Donald Trump-it në Britani e ka vënë në lëvizje parlamentin e Mbretërisë së Bashkuar. Çështja do të diskutohet më 18 janar e do të transmetohet drejtpërdrejt.
Peticioni u hartua pasi Donald Trump-i, aspiruesi për kandidat i republikanëve në zgjedhjet presidenciale në SHBA, kërkoi në fundin e vitit të shkuar që muslimanëve t’u mbyllej dera për të hyrë në Shtetet e Bashkuara. Që prej 8 dhjetorit ai mund të nënshkruhej nga kushdo, dhe numri i madh i atyre që kanë firmosur në të e ka detyruar parlamentin britanik ta marrë në konsideratë e ta vërë në axhendë për diskutim.
Në peticion thuhet: “Nëse Mbretëria e Bashkuar do të vazhdojë ta zbatojë kriterin e ‘sjelljes së papranueshme’ për ata që duan të hyjnë në kufijtë e saj, ai duhet të zbatohet ndershmërisht për të pasurit dhe për të varfërit, për të dobëtit dhe të fuqishmit.”
Vetë kryeministri britanik, David Cameron, do ta quante propozimin e Trump-it për muslimanët si të padobishëm dhe mjaft të gabuar. Qeveria la të kuptohej muajin e shkuar se nuk do ta refuzonte hyrjen e Trump-it në vend pas valës së kritikave ndaj tij.
Deri tani nuk ka një reagim të Trump-it mbi debatin që do të zhvillohet për të në parlamentin britanik. /tesheshi.com/
