Një prej zyrtarëve më të kritikuar të shtetit, Shpend Maxhuni, që sipas Vetëvendosje-s është njeri i afërt me PDK-në, është rizgjedhur edhe për pesë vjet në krye të policisë së shtetit.
Një gjë e tillë e ka konfirmuar sot zyrtarisht kryeministri Isa Mustafa.
Që nga nisja e protestave në vend para një viti, kryepolici Maxhuni është kritikuar tej mase nga opozita, por edhe ekspertë sigurie, të cilët kanë kërkuar që personi në fjalë të japë dorëheqje, sidomos pas sulmeve që ndodhën me granata ndaj institucioneve të vendit.
Ditë më parë, në 17-vjetorin e krijimit të Policisë së Kosovës, ai e quajti struktrën që ai drejton si më të mirën e vendit krahas institucioneve të tjera të shtetit të ri, por fakt është se policia e Kosovës ka shfaqur dobësi të mëdha, sidomos në pikat e ndjeshme, siç është kontrolli dhe menaxhimi i veriut të Kosovës, atje ku ligjin e bëjnë bandat dhe kontrabanda. /tesheshi.com/
