Nga Mensur Krasniqi
Do ishte më mirë që numri i ulëseve në Kuvendin maqedonas nga 120 të ishte 118? Kjo sepse dy liderët politikë shqiptare, Ahmeti e Thaçi mungojnë rregullisht në seanca. Ata e marrim mandatin, bëjnë sigurisht dhe politikë, por që kur vjen puna për t’i parë e dëgjuar në parlament kjo nuk ndodh. Pra, pasi marrin mandatin, tek i cili përkthehet dhe paga, duke qenë gjithsesi prezent në seancën konstituive, më pas nuk duken më aty.
Po pse ndodh kjo?
Xhenis Sulimani, opinionist politik, e ka një shpjegim të tijin:
“Liderët e partive politike shqiptare kurrë nuk kanë marrë pjesë në Kuvend kur në të janë shtjelluar tema me interes të përgjithshëm. Arsye për këtë është se deputetët shqiptarë në Kuvend kryejnë funksionin e të deleguarit të liderit të partisë dhe jo të përfaqësuesit të popullit, edhe pse këto të fundit me votë u japin ‘Amin’-in deputetëve. Kështu që mungesa e liderëve është më shumë fizike sesa shpirtërore, ngase as edhe një hap të vetëm deputetët nuk mund ta marrin pa pëlqimin e tyre. Ky fenomen është tregues se sa partitë tona janë demokratike në brendësi dhe si e njëjta shprehet pastaj në Kuvend. Konsideroj se në shekullin 21 liderët duhet t’u prijnë proceseve dhe jo me anë të marionetave të mundohen të mbeten ‘lider'”, tha Sulimani për tesheshi.com.
Shojegimin tjetër e jep Enis Baftijari, kryetar i shoqatës qytetare “Uniteti Progresiv”:
“Kjo praktikë fillimisht tregon një ndërgjegje të ulët të këtyre dy personaliteteve, por edhe një mosrespekt ndaj qytetarëve që i kanë votuar. Për dallim nga këto dy liderë partish të gardës së vjetër, mund të shohim se liderët e partive të reja shqiptare kanë një mentalitet më të avancuar politik dhe pozitën e tyre e shohin si shërbyes të qytetarëve dhe kauzës, e jo si zotërinj të cilëve të gjithë duhet t’ju shërbejnë. Pra kjo është esenca e lidershipit modern evropian, ku pozita e liderit nuk shihet si privilegj por si përgjegjësi. Mendoj se skena politike shqiptare ka nevojë për një rifreskim, sepse gjeneratat e vjetëra të politikanëve janë të konsumuar politikisht, nuk janë në trend me zhvillimet bashkëkohore, por edhe pengojnë proceset demokratike brenda subjekteve të tyre. Një hap i mirë në këtë drejtim kanë qenë edhe lëvizjet dhe partitë e reja në zgjedhjet e fundit të cilat ua pamundësuan monopolin liderëve të vjetër partiak të cilët janë të shantazhueshëm”, tha Baftijari për tesheshi.com.
Ai më tutje vlerëson se këtë komfort, Ahmeti e Thaçi e kanë siguruar edhe nga legjislacioni zgjedhor i cili nuk e parasheh mundësinë e garës në zgjedhje me lista të hapura të kandidatëve për deputetë.
“Listat e hapura do të kontribonin ndjeshëm në demokratizimin e brendshëm të partive politike dhe kësisoj këta liderë të mendësisë së vjetër ndoshta që moti do të ishin në historinë e politikës shqiptare”, shtoi Baftijari.
Kujtojmë se gjithnjë, Ali Ahmeti dhe Menduh Thaci kanë mbajtur rekordin për numrin më të madh të mungesave në Kuvend dhe numrin më të vogël të diskutimeve. Në disa mandate radhazi ata kanë marrë pjesë vetëm më një ose dy seanca, ndërsa ka pasur raste kur kanë përfunduar mandatin pa thënë asnjë fjalë në foltore. /tesheshi.com/
