Nga Bashkim Kastrati
Kohën e fundit Serbia e ka shtrirë ndikimin e saj në Kosovë më shumë sesa që e kishte para disa viteve. Një nga shkaqet e kësaj situate është dialogu me Serbinë nga i cili dolën shumë kompromise, e ndër to ishte edhe krijimi i “Listës Serbe” e cila nuk e njeh pavarësinë e Kosovës dhe tashme edhe nga brenda e lufton shtetin e pavarur të Kosovës. Hyrja e kësaj liste në institucionet e Kosovës ka ndikuar që serbët që e njihnin pavarësinë e Kosovës të lihen anash nga vet institucionet e Kosovë, por edhe nga qytetarët serbë.
Në këtë aspekt Serbia ka shtrirë ndikimin e saj në Kosovë në shumë fusha dhe institucionet e Kosovës janë dorëzuar përballë këtij ndikimi dhe nuk ndërmarrin masa konkrete. Një nga shembujt e këtij ndikimi është fakti se një numër asetesh të Postës së Kosovës vazhdojnë të shfrytëzohen pa asnjë problem nga Posta e Serbisë. Madje në të kryhen të gjitha aktivitetet normalisht pa u penguar nga askush.
Në qendrën kryesore që mbulon pjesën dërrmuese të territorit, në Graçanicë, Posta e Serbisë kryen një numër të madh të shërbimeve. Aty përveç letrave, qytetarët e komunitetit serb dhe të komuniteteve tjera i marrin edhe pensionet e Serbisë.
Të dhënat zyrtare të Postës së Kosovës tregojnë se janë gjithsej 21 zyra postare që vazhdojnë të shfrytëzohen nga posta serbe dhe mbi të cilat institucionet shtetërore të Kosovës nuk kanë asnjë ndikim.
Kryeshef i kësaj ndërmarrje, e cila është 100% në pronësi të shtetit të Kosovës, ka deklaruar ditë më parë se ka kërkuar nga institucionet ndihmën për të kthyer asetet e saj në shfrytëzim, por deri më tash pa asnjë sukses.
Kontrolli i Serbisë në këto asete të Postes e dëmton financiarisht këtë ndërmarrje e cila tash e disa vite ka probleme financiare.
Përveç këtij problemi, Posta e Kosovës po vazhdon të ketë të pamundur kryerjen e një varg aktivitetesh, që do t’i sillnin përfitime ekonomike, pasi nuk njihet ende ndërkombëtarisht.
Nga ana tjetër, ministrja për Dialog, Edita Tahiri, vazhdon të insistojë se asetet që po shfrytëzohen nga Posta e Serbisë do t’i kthehen Postës së Kosovës. Deklarata të tilla të Tahiri ka thënë edhe për çështje të tjera, por në realitet nuk është bërë asgjë konkrete.
Serbia në vazhdimësi po e cenon sovranitetin e Kosovës
Njohësit e rrethanave politike në Kosovë në vazhdimësi kanë deklaruar se ndikimi i Serbisë në shumë fusha në Kosovë dhe mos reagimi i institucioneve të Kosovës tregon se ka një përulje të shtetit të Kosovës ndaj atij të Serbisë, pasi që Serbia me këto veprime po e cenon sovranitetin e Kosovës.
Krenar Shala opinionist, ka thënë për tesheshi.com se pengesat që paraqitën në raport me ndikimin e Serbisë në Kosovë janë si pasojë e qasjes jo të mirë që e ka pala e Kosovës në bisedimet me Serbinë.
“Konsideroj që procesi i dialogut me Serbinë është duke ngecur pikërisht për shkak të faktit që kemi një qeveri e cila e ka besueshmërinë shumë të ulët tek publiku në njërën anë, dhe si pasojë, e përdorë qëllimin e dialogut me Serbinë si levë për ta zgjatur pushtetin”, thotë Shala.
Ai thotë se ndikimi i Serbisë në procese të ndryshme në Kosovë po e cenojnë rëndë sovranitetin e Kosovës si shtet. Sipas tij, kjo po ndodh edhe për shkak të infiroritetit të krerëve të Kosovës ndaj Beogradit zyrtar. Ai mendon se në këtë situatë është e domosdoshme që të mbahen zgjedhjet dhe të ndryshohet ky kurs politik ndaj Serbisë.
“Sovraniteti dhe integriteti i Kosovës është duke u vënë në pikëpyetje, prandaj është e domosdoshme që qytetarët t’i rilegjitimojnë institucionet në mënyrë që të kemi një qeverisje e cila nuk është inferiore ndaj Serbisë dhe e cila e shfrytëzon dialogun për të forcuar subjektivitetin dhe integritetin territorial të saj”, theksoi Shala. /tesheshi.com/
