FIFA do t’i paguajë 209 milionë dollarë klubeve, lojtarët e të cilëve garuan në Kupën e Botës të vitit të kaluar në Katar, njoftoi të enjten, më 13 korrik, organi suprem botëror i futbollit.
Pagesat do të bëhen për 440 klube nga 51 vende të ndryshme, lojtarët e të cilëve ishin në turneun nëntor dhe dhjetor të kaluar, i cili u fitua nga Argjentina.
FIFA do të paguajë një shumë ditore prej 10,950 dollarë për secilin nga 837 futbollistët në Kupën e Botës, pavarësisht se sa minuta kanë luajtur gjatë turneut.
Shuma totale për lojtar ndahet dhe shpërndahet në klub ose klube për të cilat lojtari ishte regjistruar në dy vitet para finales në Katar.
Kjo është një rritje në krahasim me 8,530 dollarë që FIFA pagoi për lojtar në Kupën e Botës 2018 në Rusi.
Për WC Katar, gjithsej 46 klube angleze do të jenë përfituesit më të mëdhenj me një shumë totale prej 37,713,297 dollarë, të ndjekur nga klubet nga Spanja, Gjermania, Italia dhe Franca.
Manchester City do jetë më e paguari me shumën prej 4,596,445 dollarë, ndjekur nga Barcelona (4,538,955 dollarë) dhe Bayern Munich (4,331,809 dollarë).
Sipas marrëveshjes së nënshkruar në fillim të këtij viti nga FIFA dhe Shoqata e Klubeve Evropiane, 355 milionë dollarë do të shpërndahen për klubet si pjesë e programit për Kupat e Botës 2026 dhe 2030. /tesheshi.com/
