Shuhet Sinead O’Connor, muaj pas humbi të birin

Këngëtarja e famshme irlandeze Sinead O’Connor vdiq në moshën 56-vjeçare pas disa vitesh luftë me probleme mendore, raportoi Daily Mail.

Në një deklaratë, familja e këngëtares së njohur shprehu “trishtimin e madh për vdekjen e të dashurës Sinead”.

“Familja dhe miqtë e saj ndihen të dërrmuar dhe do të donin privatësi në këtë kohë shumë të vështirë”, tha familja O’Connor në një deklaratë.

Vdekja e një djali 17-vjeçar

Vdekja e O’Connor erdhi 18 muaj pas vdekjes së djalit të saj 17-vjeçar Shane, ndodhur në janar 2022.

Këngëtarja, e cila ndryshoi emrin e saj në Shuhada’ Sadaq në vitin 2018 kur u konvertua në Islam, tha në atë kohë se Shane ishte “drita e jetës së saj”.

Në postimin e saj të fundit në Twitter, ajo postoi foton e tij me mbishkrimin se ai ishte dashuria e jetës dhe drita e shpirtit të saj dhe se pas vdekjes së tij ajo nuk ndihej më e gjallë.

Gjatë karrierës së saj, Sinead O’Connor publikoi dhjetë albume në studio. Albumi i saj debutues në studio “The Lion and the Cobra” në 1987 u rendit ndërkombëtarisht dhe albumi i saj i dytë “I Do Not Want What I Haven Got” në 1990 mori vlerësime të mira dhe u bë suksesi i saj më i madh, duke shitur më shumë se shtatë milionë kopje.

Kënga e saj më e famshme, “Nothing Compares 2 U”, e shkruar nga Prince, u emërua kënga numër një në botë në Billboard Music Awards 1990.

Sinead O’Connor lindi në Dublin në vitin 1966 dhe në moshën 13-vjeçare la nënën e saj dhe shkoi të jetonte me babain e saj, i cili u martua me një grua të re në Virxhinia, SHBA. /tesheshi.com/