Shkencëtari britanik James Lovelock, i cili u bë i famshëm për paralajmërimin e tij për krizën klimatike dhe themeluesi i “Teorisë së Tokës” që e paraqet Tokën si një organizëm të gjallë të aftë për vetërregullim, ka vdekur në moshën 103-vjeçare, njoftoi sot familja e tij.
“James Lovelock ndërroi jetë dje të martën në shtëpinë e tij, i rrethuar nga familja, në ditëlindjen e tij të 103-të”, është bërë e ditur nga familja e të ndjerit. “Ai ishte i njohur botërisht si një pionier, profet i krizës klimatike dhe themelues i Teorisë Gaia”, thuhet në deklaratën e familjes.
Duke e paraqitur veten gjatë gjithë karrierës së tij si një “shkencëtar i pavarur”, Lovelock ishte përplasur me kolegët mbi vizionin e tij apokaliptik të krizës klimatike.
“Tani është tepër vonë, tepër vonë, për të shpëtuar planetin siç e njohim ne,” i tha ai AFP-së në vitin 2009, disa muaj përpara Konferencës së dështuar të Kopenhagës për Klimën (COP15). “Përgatituni për humbje masive njerëzore”, kishte deklaruar ai, një nga të paktët shkencëtarë në atë kohë që parashikoi të ardhmen e zymtë.
I lindur në vitin 1919, Lovelock u rrit në Londrën jugore dhe punoi për 20 vjet në Institutin Britanik për Kërkime Mjekësore. Ai u punësua nga NASA në fillim të viteve 1960 dhe u transferua në Kaliforni për të punuar në kërkime mbi mundësinë e jetës në Mars.
Ai u bë i njohur për formulimin e “Teorisë Gaia” në vitin 1970, duke e paraqitur Tokën si një organizëm të gjallë të aftë për vetërregullim. Në atë kohë, teoria e tij u kundërshtua ashpër.
Gjeniu i tij e bëri atë “Forrest Gump” të shkencës, shkruante gazetari britanik i Guardian, Jonathan Watts.
“Me siguri shkencëtari më i rëndësishëm i pavarur i shekullit të kaluar, Lovelock ishte dekada përpara kohës së tij,” vëren Muzeu i Shkencës në Londër.
Duke komentuar mbi pandeminë Covid-19, James Lovelock i kishte thënë AFP-së në qershor 2020 se “po vret bashkëmoshatarët e mi në veçanti – të moshuarit – dhe tashmë ka shumë prej tyre (në planet)” për të theksuar më pas se “ndryshimi i klimës është më e rrezikshme për jetën në Tokë se pothuajse çdo sëmundje tjetër”. /tesheshi.com/
