Vëllai më i madh i Michael Jackson, muzikanti Tito Jackson, vdiq në moshën 70-vjeçare.
Tito ishte duke u nisur nga New Mexiko për në Oklahoma kur vdiq, sipas mikut të familjes dhe menaxherit Steve Manning.
Ai tha për Entertainment Tonight se beson se Tito pësoi një atak në zemër, por shkaku i vdekjes nuk do të përcaktohet deri më vonë.
Ditët e fundit Tito ka qenë në turne me vëllezërit Marlon dhe Jackie në Evropë, ku në fund të javës së kaluar publikoi postimin e fundit në Instagram, ku vëllezërit i bëjnë homazhe Michael Jackson, shkruan BBC.
“Përpara shfaqjes sonë në Mynih, vëllezërit e mi Jackie, Marlon dhe unë vizituam memorialin e bukur të vëllait tonë të dashur Michael Jackson. Ne jemi thellësisht mirënjohës për këtë vend të veçantë që nderon jo vetëm atë, por trashëgiminë tonë të përbashkët. Faleminderit që e mbani gjallë shpirtin e tij”, thuhet në postim.
Tito, emri i vërtetë Toriano Adaryll Jackson, ishte një muzikant amerikan. Ai ishte një anëtar origjinal i Jackson 5, dhe disa nga hitet e tyre përfshijnë |I Want You Back”, “ABC” dhe “I’ll Be There…”.
Gjatë karrierës së tij muzikore, ai pati tre nominime për Grammy dhe u fut në Rock and Roll Hall of Fame si anëtar i Jackson 5. /tesheshi.com/
