Francezi Roland Mesnier, pastiçeri i pesë presidentëve amerikanë, ka vdekur në moshën 78-vjeçare në SHBA, njoftoi sot familja e tij.
Mesnier vdiq të premten në Virxhinia nga kanceri, thanë djali i tij Georges dhe motra e tij më e madhe, Genevieve Guiller Mesnier.
Ai lindi në Bonnet, një fshat i vogël pranë Besanccon-it, në një familje të varfër me nëntë fëmijë. Ai u punësua në Shtëpinë e Bardhë nga gruaja e Presidentit Jimmy Carter, Rosalyn, në vitin 1979.
“Kam kujtime kaq të bukura nga shefi i kuzhinës Mesnier. Atij i pëlqente t’i bënte njerëzit të buzëqeshnin me krijimet e tij të mrekullueshme, siç janë shtëpitë e tij të famshme të xhenxhefilit të Krishtlindjeve. Do të na mungojë”, shkroi një tjetër ish-Zonja e Parë, Hillary Clinton, së bashku me një foto të saj me Messnier.
“Jemi të pikëlluar kur mësuam për ndarjen nga jeta të Roland Mesnier, i cili shërbeu si kuzhinier i Shtëpisë së Bardhë për 26 vjet, për pesë presidentë dhe për 25 prej këtyre viteve ishte shef i ëmbëlsirave. Pasioni i tij,
dashuria për punën e tij, do të nguliten në kujtesën tonë”, tha Fondacioni Ronald Reagan.
Messnier, i cili kishte marrë nënshtetësinë amerikane, u largua nga Shtëpia e Bardhë në vitin 2004.
Messnier nuk ngurroi të tregonte anekdota për presidentët dhe familjet e tyre: George W. Bush e donte akulloren me arrat dhe se ishte “personi më i paduruar që kam takuar ndonjëherë”. Zonja Reagan ishte një “perfeksioniste”. Bill Clinton ishte alergjik ndaj sheqerit, miellit dhe çokollatës, por në të njëjtën kohë ishte shumë grykës dhe për këtë shefi i kuzhinës u detyrua të krijonte receta të reja, pa përbërësit e diskutueshëm. /tesheshi.com/
