Sulmuesi legjendar i Manchester United dhe i kombëtares angleze të futbollit, Bobby Charlton, ka vdekur të shtunën në moshën 86-vjeçare, njoftoi Manchester United.
“Manchester United është në zi për vdekjen e Sir Bobby Charlton, një prej lojtarëve më të mëdhenj dhe më të dashur në historinë e klubit. Sir Bobby ishte një hero për miliona, jo vetëm në Mbretërinë e Bashkuar, por në mbarë botën. Ne e admiruam atë për sportivitetin dhe integritetin e tij si dhe cilësitë e tij madhështore si futbollist; ai do të mbahet mend përgjithmonë si një i madh futbolli”.
“Ne shprehim ngushëllimet tona të sinqerta për gruan e tij Norma, fëmijët dhe nipërit e mbesat”, njoftoi United.
Bobby Charlton kaloi 17 vjet në Old Trafford dhe bëri 758 paraqitje për United me 249 gola.
Me klubin, ai fitoi titullin e Kampionatit Evropian (1968), tre tituj të kampionatit anglez dhe një FA Cup.
Pas karrierës së tij si lojtar, Charlton punoi si menaxher në Manchester United për 39 vjet.
Në vitin 1966 fitoi kampionatin botëror me kombëtaren angleze dhe në total realizoi 106 paraqitje për “Albionin krenar” me 49 gola. /tesheshi.com/
