Ilvi Meta, 31 vjeç, thuhet se u vetëvar në Komisariatin e Kavajës, pak pasi ishte arrestuar nën akuzën e një vjedhjeje. Ngjarja e rëndë ka trazuar Policinë e Shtetit, pasi është fjala për një tjetër jetëhumbje të burgosurish pas rastit të Kamzës pak javë më parë. Për më tepër, ka zëra se ndaj tij mund të jetë ushtruar dhunë.
Kjo ka bërë që kryepolici Gledis Nano të çojë një ekip të posaçëm në Komisariatin e Kavajës për të hetuar se çfarë ka ndodhur realisht aty me pasojë jetëhumbjen e një të riu, që thuhet se i ka dhënë fund jetës me çarçaf.
Në një deklaratë për shtyp, Policia e Shtetit njofton se “Lidhur me ngjarjen e ndodhur sot, në Komisariatin e Policisë Kavajë, ku në dhomat e sigurisë u gjet pa shenja jete, shtetasi I. M., i dyshuar si i vetëvarur, i cili ishte ndaluar mesditën e sotme, informojmë se:
Drejtori i Përgjithshëm i Policisë së Shtetit Gledis Nano ka dërguar menjëherë në Komisariatin e Policisë Kavajë, një grup inspektimi, të përbërë nga specialistë të Departamentit të Sigurisë Publike dhe të Drejtorisë së Standardeve Profesionale, për të verifikuar nëse janë zbatuar ose jo procedurat standarde për sigurinë e personave të shoqëruar, të arrestuar dhe të ndaluar nga ana e Komisariatit të Policisë Kavajë.
Veprimet hetimore po kryhen nga një grup i posaçëm hetimor i Agjencisë për Mbikëqyrjen Policore, nën drejtimin e Prokurorisë pranë Gjykatës së Rrethit Gjyqësor Kavajë.
Policia e Shtetit nuk është pjesë e këtij hetimi.
Policia e Shtetit mbetet e angazhuar dhe e interesuar për zbardhjen dhe dokumentimin e plotë ligjor të ngjarjes”.
Ka reaguar gjithashtu dhe i ati i jetëhumburit, duke i quajtur policët qen.
“Polici qensh, polici qensh janë, e morën paradite bënë kontroll në shtëpi, edhe thanë do ta sjell, s’ka gjë s’ka gjë edhe ikën. E akuzuan për vjedhjen e një dere alumini. Nuk e di, unë isha në një lokal duke pirë kafe me një shok, vetëm kur më thanë Agim ik tek shpia se ka ndodh diçka. Kur shkova në shtëpi gjeta gruan, vajzën duke qarë. Nuk më kanë thënë asgjë, qoftë policia, kryeministri Edi Rama që mos e bëfshin pikën e hajrit. Nuk e di s’më ka ardhur asnjë informacion. S’më kanë thënë asgjë, do ta zbardh këtë gjë”, tha ai, Agim Meta. /tesheshi.com/
