Ka ndërruar jetë pikërisht në ditën e lindjes, ish-kreu i Akademisë së Shkencave Gudar Beqiraj, i njohur dhe si ish-peshëngritës në vitet ’60-’70, ndër me të njohurit e këtij sporti.
Ai sot mbushi 72 vjeç, duke e ndalur frymën pikërisht në këtë ditë e në këtë moshë.
Siç informon Akademia e Shkencave, akademik Prof. Dr. Gudar Beqiraj mbaroi studimet në Universitetin e Tiranës, Fakulteti i Shkencave të Natyrës, Departamenti i Matematikës. Ishte specializuar në Gjeostatistikë pranë Qendrës së Gjeostatistikës në Fontainbleau, Francë si dhe në metodat e informatikës së aplikuar në Gjeofizikë në Universitetin Paris VI, Francë. Në 1992 ka kryer punë shkencore pranë Universitetit “La Sapienza”, Romë, Itali. Në vitin 1994 merr titullin “Profesor”, dhënë nga Këshilli i Lartë i Atestimit të Komitetit të Shkencës dhe Teknologjisë. Në vitin 2003 i akordohet titulli “Akademik”, dhënë nga Akademia e Shkencave e Shqipërisë, Në 2012 është bërë anëtar i Akademisë Europiane të Shkencave dhe Arteve.
Ndërsa te aktivitetet sportive veçon:
1967-1974. Peshëngritës në ekipin “Studenti”
1975-1982. Arbitër kombëtar në peshëngritje
1982 Arbitër i kategorisë së parë ndërkombëtare në peshëngritje
1992-2000 President i Federatës Kombëtare të Peshëngritjes
1996-2000 Zëvendëspresident i Komitetit Olimpik Kombëtar
1982-2003. Shefi i delegacioneve shqiptare në Lojërat Olimpike, Kampionatet Botërore, Lojërat Mesdhetare dhe Kampionatet Europiane e Ballkanike në Peshëngritje
2001. Diplomë nga Presidenti i Komitetit Ndërkombetar Olimpik, Juan Antonio Samaranch, për kontributin e vyer si vullnetar për zhvillimin e sportit dhe Olimpizmit, si edhe për promovimin e miqësisë dhe solidaritetit ndërmjet popujve
2007 Urdhëri Olimpik, dhënë nga Komiteti Olimpik Kombëtar. /tesheshi.com/
