Një lajm i hidhur vjen nga Amerika e Jugut për të gjithë tifozët e Barcelonës. Ka ndërruar jetë në moshën 76-vjeçare futbollisti legjendar peruan dhe ish-sulmuesi i skuadrës nga Katalonja, Hugo Sotil.
Ai u shtrua në spital në fillim të këtij muaji pasi pati një problem të rëndë shëndetësor. Mjekët e vendosën në terapi intensive dhe bënë çmos për të përmirësuar gjendjen e tij, por Sotil nuk mundi të shërohej dhe humbi betejën për jetën.
“Një ditë kur të vdes, më varrosni me fanellën e Barcelonës”, ka thënë dikur futbollisti që ka veshur numrin 10 në klubin e famshëm spanjoll.
Ai luajti për Barcelonën nga viti 1973 deri në 1977 dhe ishte pjesë e një prej gjeneratave më të mira në historinë e klubit. Ai ishte një sulmues në skuadrën e drejtuar nga i famshmi Johan Cruyff si lider në fushë dhe më vonë humbi vendin e tij në ekip sepse spanjollët aktivizuan Johan Neeskens, lojtarin e tretë të huaj për atë sezon.
Gjithsesi, Sotil ishte një i preferuar i fansave. Ata e donin temperamentin e tij amerikanolatin dhe ishin veçanërisht të dashur për disa nga golat që ai shënoi. Ai ishte protagonist në fitoren bindëse ndaj Realit (5:0) duke tundur rrjetën e rivalit më të madh, si dhe ishte pjesë e ekipit kur fitimi i titullit përfundoi një seri prej 14 vitesh pa trofe.
Sotil fitoi kampionatin në Spanjë me Barcelonën si dhe katër herë trofeun në turneun Joan Gamper, që Barcelona e organizon tradicionalisht në gusht, para fillimit të sezonit të ri.
Ai fitoi Kupën e Amerikës me kombëtaren peruane, ndërsa fitoi edhe disa trofe të rëndësishëm me klubet e Perusë së tij të lindjes. Ai luajti për gjashtë skuadra të ndryshme në vendin e tij të lindjes, ndërsa Barcelona ishte klubi i tij i vetëm në Evropë. /tesheshi.com/
