Tim Page, fotoreporteri legjendar i Luftës së Vietnamit, vdiq dje në Australi në moshën 78-vjeçare nga kanceri.
Kolegët e tij të vjetër nderuan një “talent të jashtëzakonshëm” në personin e fotoreporterit anglez, i cili pasqyroi ngjarje të panumërta për gjysmë shekulli. Ai u bë i njohur për serinë e tij të fotove tronditëse nga Lufta e Vietnamit.
Me një aparat fotografik Leica në dorë, si dhe një cigare në gojë, Tim Page kaloi pjesën më të madhe të viteve 1960 duke përshkuar gadishullin e Indokinës për të kapur imazhe që do të shënonin luftën, por dhe një epokë të tërë.
“Çdo foto e luftës është një foto kundër luftës”, do të thoshte ai në një intervistë gjysmë shekulli më vonë.
I dashur dhe karizmatik, Tim Page futet në fotoreporteri ndërsa lufta e Vietnamit përshkallëzohet, për t’u bërë ikona e një brezi fotoreporterësh të patrembur.
Personazhi i luajtur nga Dennis Hopper në filmin “Apocalypse Now” u bazua në Tim Page.
Por Vietnami ndikoi si në jetën e tij personale ashtu edhe në karrierën e tij profesionale: do t’i duhej më shumë se një dekadë për t’u rikuperuar nga plagët e luftës dhe më vonë do të pranonte hapur se vuante nga stresi post-traumatik.
Tim Page si person “nuk pëlqehej nga të gjithë”, shpjegon miku i tij Luke Hunt, por ai ishte shumë i hapur dhe këshilltar i shumë fotografëve të rinj që donin të ndiqnin gjurmët e tij.
Në fillim të viteve 1990, Tim Page u vendos në Kamboxhia, ku punoi për disa media ndërkombëtare.
Ai më vonë iu përkushtua ruajtjes së paqes dhe nderimit të kujtimit të gazetarëve që humbën jetën në vijën e parë të luftës, duke kërkuar prej vitesh të zbardhte zhdukjen e miqve të tij Sean Flynn dhe Dana Stone, të cilët konsiderohet se u vranë nga Khmerët e kuq.
Në vitin 1997 mori pjesë në shkrimin e librit “Requiem”, i cili ndjek gjurmët e 135 fotoreporterëve që humbën jetën në Luftën e Indokinës dhe më pas në Luftën e Vietnamit. /tesheshi.com/
